Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Zëdhënësi i Gjykatës Speciale, Michael Doyle, ka njoftuar se deklaratat përfundimtare në procesin gjyqësor ndaj ish-krerëve të UÇK-së pritet të përfundojnë të mërkurën e ardhshme, pas së cilës rasti do të konsiderohet i mbyllur për shqyrtim nga trupi gjykues. Sipas Doyle, vendimi i gjykatës pritet të merret brenda një afati prej tre deri në pesë muajve nga përmbyllja e procedurës. Ai sqaroi se kolegji gjyqësor do të ketë fillimisht tre muaj kohë për vlerësimin e plotë të çështjes, me mundësi shtesë edhe për dy muaj të tjerë, nëse konsiderohet e nevojshme. Doyle bëri të ditur se Prokuroria e Specializuar tashmë ka përfunduar deklaratën përmbyllëse, ndërsa mbrojtja e Hashim Thaçit dhe Kadri Veselit ka paraqitur argumentet e saj. Në vazhdim pritet që deklaratat përfundimtare t’i paraqesin edhe ekipet mbrojtëse të Rexhep Selimit dhe Jakup Krasniqit. Ai theksoi se gjatë fazës së vlerësimit, gjykata do të shqyrtojë kredibilitetin e dëshmitarëve, bazën dhe peshën e provave, duke rikujtuar parimin themelor se të akuzuarit konsiderohen të pafajshëm derisa të shpallen fajtorë me vendim të formës së prerë. Sa i përket paraburgimit të ish-presidentit Hashim Thaçi, Doyle deklaroi se masa është vlerësuar ende e domosdoshme për shkak të rrezikut të mundshëm të ndikimit në procedura ose ndaj dëshmitarëve.
