Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Përfaqësuesit e platformës qytetare Liria ka Emër, Eliza Hoxha dhe Ismail Tasholli, vizituan sot familjen e Kadri Veseli, i cili po gjykohet në Hagë së bashku me Hashim Thaçi, Jakup Krasniqi dhe Rexhep Selimi, në një proces që ndodhet në fazën finale. Sipas njoftimit për media, ata u pritën nga bashkëshortja Violeta Veseli, si dhe nga fëmijët e familjes, në një moment të cilësuar si vendimtar për familjen dhe për vendin. Gjatë vizitës, përfaqësuesit e platformës shprehën solidaritet të plotë me familjen Veseli, duke ritheksuar bindjen se lufta për liri ishte e drejtë dhe e pastër. Ata informuan familjen edhe për organizimin e marshit qytetar “Drejtësi, jo politikë”, që do të mbahet më 17 shkurt në Prishtinë. “Qëndrojmë pranë familjes Veseli me bindjen e plotë se drejtësia nuk mund të shkëputet nga e vërteta historike dhe se lufta jonë për liri ishte e drejtë”, ka deklaruar Eliza Hoxha. Ndërkaq, Ismail Tasholli ka theksuar se marshi i 17 shkurtit synon të jetë zë qytetar për drejtësi dhe dinjitet, duke shprehur pritjen që të akuzuarit në Hagë të lirohen dhe të kthehen pranë familjeve të tyre. Nga ana e saj, Violeta Veseli ka falënderuar platformën për angazhimin dhe solidaritetin e treguar. Në fund të njoftimit, platforma “Liria ka Emër” ka ritheksuar angazhimin për mobilizim të gjerë qytetar, duke theksuar se uniteti dhe solidariteti mbeten përgjigjja më e fortë në mbrojtje të drejtësisë dhe vlerave të luftës çlirimtare.
