Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Partisë Socialdemokrate, Dardan Molliqaj, ka kritikuar ashpër liderët opozitarë lidhur me procesin e zgjedhjes së presidentit, duke kërkuar që vendi të shkojë në zgjedhje të reja parlamentare. Gjatë një aksioni simbolik të mbajtur pranë selisë së Lidhja Demokratike e Kosovës, Molliqaj e quajti kryetarin e kësaj partie, Lumir Abdixhiku, “servil të Albin Kurtit”, ndërsa kritikoi edhe kryetarin e Partia Demokratike e Kosovës, Bedri Hamza, për atë që e cilësoi si qasje naive në raport me pushtetin. Sipas tij, Abdixhiku dhe Hamza po i shërbejnë “hegjemonisë” së kryeministrit Albin Kurti në procesin e zgjedhjes së presidentit, duke vepruar, siç tha ai, për interesa të ngushta politike. “Ne duhet të jemi këmbëngulës për t’i mbajtur përgjegjës. Nuk është çështje e një emri të presidentit, por e faktit se kjo i shërben këtij pushteti. Pas pesë vitesh do të flasim për dëmet që shkaktohen”, është shprehur Molliqaj. Ai ka theksuar se zgjidhja e vetme politike është rikthimi te qytetarët përmes zgjedhjeve të reja. “Vendi duhet të shkojë në zgjedhje, e jo t’ia zgjedhë presidentin. Populli i Kosovës nuk ia ka dhënë 80 deputetë Albin Kurtit për ta zgjedhur presidentin. Le ta vendosë populli”, ka deklaruar ai.
