Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Gjykata Supreme në Hagë ka vendosur ta lërë në fuqi dënimin prej 13 vitesh burg ndaj ish-pjesëtarit të Ushtria Çlirimtare e Kosovës, Pjetër Shala, duke konstatuar se nuk ka pasur shkelje ligjore në aktgjykimin e Apelit. Megjithatë, një element i vendimit ka tërhequr vëmendje, pasi Shala është shpallur fajtor për një vrasje për të cilën vetë gjykata ka konstatuar se ai nuk ishte personi që kishte kryer të shtënat. Vendimi është mbështetur në konceptin juridik të Ndërmarrjes së Përbashkët Kriminale, përmes së cilës përgjegjësia penale mund t’i atribuohet një personi edhe nëse ai nuk është autori i drejtpërdrejtë i krimit. Në arsyetimin e saj, Gjykata Supreme ka theksuar se mbrojtja e Shalës nuk ka arritur të dëshmojë ndonjë gabim ligjor në vendimet e mëhershme. “Paneli vëren se Z. Shala kundërshton atribuimin e përgjegjësisë përmes Ndërmarrjes së Përbashkët Kriminale, por nuk identifikon një gabim specifik ligjor apo një shkelje të konsiderueshme procedurale sipas Nenit 48(7) të Ligjit”, thuhet në vendim. Sipas gjykatës, argumentet e mbrojtjes janë kryesisht kundërshtime ndaj gjetjeve faktike të trupave gjykuese dhe jo pretendime për shkelje të ligjit. Pjetër Shala kishte theksuar më herët se është e papranueshme që të shpallet fajtor për një vrasje, ndërkohë që edhe vetë gjykata pranon se ai nuk është autori i të shtënave që shkaktuan vdekjen e viktimës. Me vendimin e fundit të Gjykata Supreme e Dhomave të Specializuara të Kosovës, procesi gjyqësor ndaj Shalës konsiderohet i përmbyllur dhe dënimi prej 13 vitesh burg mbetet në fuqi.
