Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Shefi i Grupit Parlamentar nga Aleanca për Ardhmërinë e Kosovës, Besnik Tahiri, ka kritikuar ashpër kryeministrin Albin Kurti, duke e akuzuar se po e përdor ftesën për takim me opozitën rreth çështjes së presidentit si manovër politike për të shmangur përgjegjësinë për krizën institucionale. Sipas Tahirit, iniciativa e Kurtit për konsultime me opozitën nuk është përpjekje reale për zgjidhje, por një strategji për të përmbysur narrativën e bllokadës politike që, sipas tij, është krijuar nga vetë qeveria. Ai ka paralajmëruar se kryeministri po përpiqet të krijojë një situatë ku, në rast se nuk arrihet një marrëveshje për zgjedhjen e presidentit, përgjegjësia të bartet tek opozita dhe tek Gjykata Kushtetuese e Kosovës. Tahiri gjithashtu ka theksuar se kjo lëvizje e Kurtit synon të zhvendosë vëmendjen publike nga përplasjet e fundit me presidenten Vjosa Osmani dhe të çorientojë opozitën në një proces pa agjendë dhe pa parakushte të qarta. Sipas tij, nëse opozita hyn në këtë proces pa qartësi politike, ekziston rreziku që kryeministri ta përdorë situatën për të shmangur përgjegjësinë dhe për ta shtyrë vendin drejt zgjedhjeve të parakohshme, në përputhje me kalkulimet e tij politike.
