Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Rinia Demokratike e Partisë Demokratike të Kosovës ka zhvilluar të dielën një aksion simbolik para ndërtesës së Qeveria e Republikës së Kosovës në Prishtinë, duke kritikuar vendimin e fundit të ekzekutivit për lejimin e përdorimit të dokumenteve të lëshuara nga Serbia për personat që nuk posedojnë dokumente të Kosovës. Aktivistët e rinisë së PDK-së, zbrazën simbolikisht një thes me deklarata të mëhershme të kryeministrit Albin Kurti, përmes të cilave ai kishte deklaruar se strukturat paralele serbe në veri të Kosovës janë çrrënjosur. Kryetarja e Rinisë Demokratike të Kosovës dhe njëherësh deputete e PDK-së, Arbnora Salihu, tha se aksioni kishte për qëllim të tregojë, sipas saj, mospërputhjen mes deklaratave të kryeministrit ndër vite dhe vendimeve të fundit të qeverisë. Sipas Salihut, Kurti në disa raste kishte deklaruar se nuk do të kishte tolerancë ndaj strukturave ilegale në veri të vendit dhe se ato do të largoheshin nga Kosova. Ajo përmendi deklarata të tij nga vitet 2022, 2023 dhe 2025, kur sipas saj ishte thënë se epoka e strukturave paralele kishte përfunduar. Salihu tha se vendimi i 14 marsit për lejimin e përdorimit të letërnjoftimeve të lëshuara nga Serbia për qytetarët që nuk kanë dokumente të Kosovës përbën, sipas saj, një ndryshim të kësaj qasjeje. Rinia e PDK-së e cilësoi këtë vendim si të dëmshëm për interesin shtetëror, duke argumentuar se ai krijon një precedent të rrezikshëm dhe, sipas tyre, i jep legjitimitet strukturave paralele.
