Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Forca e Sigurisë së Kosovës ka thelluar bashkëpunimin me Shtetet e Bashkuara të Amerikës përmes një takimi të rëndësishëm ndërmjet udhëheqësve ushtarakë. Komandanti i Forca e Sigurisë së Kosovës, Gjenerallejtënant Bashkim Jashari, priti në takim Oficerin Komandues të anijes luftarake USS Pearl Harbor (LSD-52), komandantin Alban Dervishi. Gjatë takimit, Gjeneral Jashari e uroi komandantin Dervishi për sukseset në drejtimin e një prej anijeve të rëndësishme të Forcave Detare të SHBA-së, duke e informuar njëkohësisht për zhvillimet dhe arritjet e fundit të FSK-së. Ai theksoi veçanërisht bashkëpunimin e ngushtë dhe të suksesshëm me Forcat e Armatosura të Shteteve të Bashkuara, si dhe partneritetin strategjik me Garda Kombëtare e Ajovës, që ka luajtur rol kyç në ngritjen e kapaciteteve të FSK-së. Në anën tjetër, Komandant Dervishi vlerësoi lidershipin e Gjeneral Jasharit dhe përgëzoi FSK-në për progresin në zhvillimin e kapaciteteve operacionale, me theks të veçantë në avancimin e burimeve njerëzore dhe zhvillimin profesional të personelit ushtarak. Në përmbyllje të takimit, të dy palët u pajtuan për thellimin e mëtejmë të bashkëpunimit dhe shkëmbimin e përvojave, si element kyç për rritjen e ndërveprueshmërisë dhe fuqizimin e kapaciteteve mbrojtëse.
