Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Profesori i së drejtës ndërkombëtare, Enver Hasani, ka kritikuar ashpër mosprocedimin në Kuvend të marrëveshjes për anëtarësimin e Kosovës në Bordin e Paqes, duke e cilësuar qasjen e Lëvizja Vetëvendosje si “papjekuri totale”. Sipas Hasanit, përpjekja për të ndryshuar një marrëveshje ndërkombëtare tashmë të nënshkruar në këtë rast nga Vjosa Osmani, është e papranueshme juridikisht dhe cenon seriozitetin e shtetit në raport me partnerët ndërkombëtarë, përfshirë Shtetet e Bashkuara të Amerikës. Ai theksoi se Kuvendi nuk ka të drejtë të ndërhyjë njëanshëm në përmbajtjen e një marrëveshjeje ndërkombëtare, por vetëm ta ratifikojë ose refuzojë atë. Çdo tentim për ndryshim pa pëlqimin e palës tjetër, sipas tij, konsiderohet jo vetëm joserioz, por edhe si dalje faktike nga marrëveshja. Hasani paralajmëroi se një qasje e tillë mund të ketë pasoja të rënda politike dhe juridike, duke dëmtuar besueshmërinë ndërkombëtare të Kosovës. Ai shtoi se, nëse ka mospajtime me përmbajtjen, rruga e vetme është rinegocimi me palët nënshkruese, e jo modifikimi i njëanshëm në Kuvend. Në këtë kontekst, ai kërkoi që institucionet e Kosovës të sqarojnë qartë me palën amerikane nëse synojnë të tërhiqen nga zotimi për anëtarësim në Bordin e Paqes, duke theksuar se ky proces nuk mund të bëhet pjesërisht, por vetëm përmes pranimit të plotë të marrëveshjes.
