Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Nënkryetarja e Kuvendit te Kosovës nga radhët e PDK Vlora Çitaku, ka deklaruar se vendi është drejt zgjedhjeve të reja, duke theksuar se opozita nuk do të marrë pjesë në votimin për presidentin dhe nuk do të sigurojë kuorumin. Sipas saj, përgjegjësia për bllokadën institucionale bie mbi Lëvizja Vetëvendosje dhe kryeministrin Albin Kurti, të cilët, sipas Çitakut, kanë dështuar të krijojnë konsensus politik për zgjedhjen e presidentit. Ajo ka kritikuar ashpër qasjen e shumicës, duke e cilësuar atë si përpjekje për “nënshtrim të vullnetit politik” të deputetëve, ndërsa ka shtuar se PDK-ja nuk do të bëhet pjesë e një procesi që, sipas saj, është i njëanshëm dhe i paqëndrueshëm. Në deklarimet e saj, Vlora Çitaku ka theksuar se vendi tashmë po hyn në një cikël të ri zgjedhor, për të cilin, sipas saj, paralajmërimet kanë qenë të hershme dhe të qëllimshme nga ana e qeverisë. Ajo ka ngritur shqetësimin se debati politik është zhvendosur nga problemet reale të qytetarëve drejt kalkulimeve politike dhe çështjeve të emrave për poste, duke përmendur si shembull zvarritjen e proceseve për zgjedhjen e institucioneve kyçe.
