Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sinjalet e fundit nga subjektet kryesore politike në Kosova nuk japin indikacione për një kompromis të mundshëm për zgjedhjen e presidentit deri më 28 prill, afati kushtetues që, nëse nuk respektohet, çon vendin drejt zgjedhjeve të parakohshme parlamentare. Sipas një analize të Radios Evropa e Lirë, partitë politike nuk kanë bërë përpjekje serioze për të zgjidhur krizën institucionale. Opozita ka refuzuar emrat e propozuar nga Lëvizja Vetëvendosje për president, si dhe ofertën për postin e kryeparlamentarit, duke e cilësuar atë joserioze. Analisti Rrahman Paçarizi vlerëson se zgjedhjet u konvenojnë pothuajse të gjitha palëve politike, ndonëse më së paku partisë në pushtet. Sipas tij, përplasjet mes Albin Kurti dhe ish-presidentes Vjosa Osmani kanë dobësuar pozicionin e LVV-së krahasuar me rezultatin e zgjedhjeve të fundit. Një vlerësim të ngjashëm jep edhe analisti Agon Maliqi, i cili thekson se, ndonëse është e vështirë të përcaktohet qartë se kujt i konvenojnë zgjedhjet, opozita mund të përfitojë nga situata aktuale dhe të përmirësojë pozitat e saj në Kuvend. Analiza gjithashtu nënvizon faktorë të tjerë ndikues, si roli i diasporës dhe zhvillimet brenda partive politike, që mund të ndikojnë në rezultatin zgjedhor, por pa garantuar një zgjidhje të shpejtë të krizës aktuale.
