Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Veprimtari dhe publicisti Ruzhdi Jashari ka reaguar ashpër ndaj mënyrës se si në Serbi po trajtohet vdekja e ish-komandantit të Ushtrisë së Republikës Srpska, Ratko Mlladiq, i dënuar me burgim të përjetshëm për gjenocid, krime kundër njerëzimit dhe krime lufte. Jashari ka kritikuar ashpër çdo përpjekje për ta paraqitur Mlladiqin si figurë për t’u nderuar, duke e cilësuar këtë qasje si dëshmi të mungesës së një përballjeje të sinqertë të Serbisë me të kaluarën dhe përgjegjësinë për krimet e kryera gjatë luftërave në ish-Jugosllavi. Jashari ka shkruar se, pavarësisht faktit që Mlladiqi u dënua nga drejtësia ndërkombëtare për krime të rënda dhe gjenocid ndaj popullsisë civile në Bosnje e Hercegovinë, në Serbi ai vazhdon të trajtohet nga qarqe të caktuara si figurë heroike. Sipas tij, një qasje e tillë e zhvendos vëmendjen nga viktimat dhe e relativizon peshën e krimeve për të cilat ai është dënuar. “Mos e vet se të tregon vet”, ka shkruar Jashari, duke e përdorur këtë shprehje për të argumentuar se mënyra se si Serbia sillet me figurat e dënuara për krime lufte, sipas tij, tregon shumë për raportin e saj me të kaluarën. Ai ka akuzuar gjithashtu qarqe politike dhe fetare për glorifikimin e personave të dënuar për krime lufte dhe ka ngritur kritika ndaj, siç e quan ai, heshtjes ndërkombëtare përballë kësaj qasjeje. Jashari e lidh këtë me një problem më të gjerë të mospranimit të përgjegjësisë për krimet e luftërave në Bosnje e Hercegovinë dhe Kosovë. Në reagimin e tij, Jashari ka paralajmëruar se mungesa e një përballjeje të plotë me të kaluarën dhe mosdënimi politik e moral i ideologjive që prodhuan krime të tilla krijon rrezikun e përsëritjes së politikave konfliktuoze në rajon. Ai veçanërisht ka përmendur shqiptarët dhe boshnjakët si popuj që, sipas tij, kanë qenë viktima të politikave të dhunshme serbe.
