Apelohet që qytetarët që të jenë të kujdesshëm në parandalimin e zjarrvënieve në këtë kohë me temperatura të larta

Për shkak të temperaturave të larta që po mbretërojnë në vendin tonë, Agjencia për Menaxhimin e Emergjencave ka kërkuar nga qytetarët e Kosovës që të jenë të kujdesshëm në parandalimin e zjarrvënieve. “Tashmë kemi hyrë në sezonin e verës që supozohet se do të karakterizohet me temperatura të  larta të ajrit, të cilat ndikojnë në rritjen e rrezikut për shfaqjen dhe zgjerimin e vrullshëm të zjarreve në sipërfaqe të hapura, malore dhe fushore”, thuhet në njoftimin e MPB-së. “Me qëllim të evitimit të rrezikut nga zjarri, mbrojtjes të jetës së qytetarëve, të pronës, shtazëve dhe ambientit, apelojmë që të gjithë jemi të kujdesshëm dhe vigjilent për shmangen e të gjithë shkaktarëve të mundshëm të zjarrit, vërejtjen dhe lajmërimin me kohë,  si dhe të ndihmojmë në shuarjen e zjarreve”, thuhet tutje në njoftim. Qytetarët luten që të thërrasin në çfarëdo rasti në Qendrën Operative Emergjente, nëpërmjet numrit unik ( integruar) emergjent – 112. Gjithashtu mund të thirrni edhe në këta numra: njësinë profesionale të Zjarrfikësve dhe Shpëtimit në numrin e telefonit 193; Policinë e Kosovës, në numër të telefonit 192; ndihmën e shpejtë, në numër të telefonit 194. Të gjitha thirrjet janë pa pagesë.