Beteja  e Koshares: Fitore Ushtarake, politike, diplomatike e kombëtare e UÇK-së

02/03/2022 Institucionet

Shoqata e ish Brigadës 138 ” Agim Ramadani”  dhe Shoqatat e dala nga lufta e Ushtrisë Çlirimtare të Kosovës- dega në Malishevë, bashkëorganizuan ngjarjen me karakter kombëtare në vigjilje të 5, 6 dhe 7 marsit, ndarjen e ”Flamurit të Brigadës”, 138 ” Agim Ramadani”, për katër dëshmorët e luftës së Ushtrisë Çlirimtare të Kosovës, që ranë në betejën e Koshares duke luftuar përballë ushtrisë vrastare e pushtuese serbe, në çlirim të Kosovës.

Në këtë ngjarje fjalë rasti mbajti, nënkryetari i Komunës së Malishevës, Vesel Krasniqi, ku ndër të tjera tha, ”Në përkujtim të atyre që dhanë më të shtrenjtën jetën, dëshmorët, sot, për mua është ndjenjë e veçantë dhe përgjegjësi e madhe, që ne, që udhëheqim institucionet shtetërore e komunale, duke nderuar sakrificën e popullit shqiptar, gjakun dhe jetën e dëshmorëve të kombit, sot e përherë ata janë vula e themeleve të palëkundura shtetërore të Kosovës, prandaj sa herë i rikujtojmë dëshmorët e atdheut, rikujtojmë atdheun dhe shtetin e lirë”. Më pas nënkryetari Krasniqi, kërkoi edhe lirimin sa më parë të personaliteteve ushtarake e shtetërore që padrejtësisht sot po mbahen në Hagë, duke thënë se “lufta e UÇK-së, lindi dhe krijoi, gjeneral, si dhe shteti e liria e Kosovës lindi dhe krijoj burrështetas e president”, përfundoi Krasniqi.

”Jam i nderuar dhe shumë i vlerësuar nga ju sot dhe bashkëluftëtarët e mi dje nga Malisheva që ishin në brigadën 138 ” Agim Ramadani”, ajo që sot është e madhe këtu është se jemi të bashkuar, sepse të bashkuar si luftëtar e thyemë edhe kufirin shqiptaro- shqiptar, më 9 prill. Beteja e Koshares është sinonim i tri fitoreve të mëdha, fitores ushtarake, politike dhe diplomatike të UÇK-së”, tha mes tjerash, komandanti i ish Brigadës 138 “Agim Ramadani”, Gjeneral Rrustem Berisha.

Metush Kryeziu, kryetar i OVL të  UÇK-së dega në Malishevë, tha: ”Sot është ditë e madhe për Malishevën dhe historinë e saj sepse për Malishevën në këta flamuj është vet liria e Kosovës, e kombit shqiptar, në betejën e Koshares. Bashkimi i luftëtarëve, theu përgjithmonë mitin serb se ata u mposhtën përballë forcave të UÇK-së dhe kështu u thye kufiri shqiptaro- shqiptar”, përfundoi Kryeziu.

Në fund u nderuan katër  heronjtë  e Kosovës me  Flamurin e Brigadës 138 ” Agim Ramadani”

Afrim Mehmet Krasniqi- Tërpezë

Aziz Bajram Gashi- Balincë

Imer Isak Kryeziu- Pagarushë

Izet Islam Morina -Astrazup.

Flamujt dhe mirënjohjet i ndanë, Nënkryetari i Komunës së Malishevës, Vesel Krasniqi dhe Gjenerali, Rrustem Berisha.

Lavdi dhe nderim dëshmorëve të atdheut!

Kontrolloni gjithashtu

U mbajt akademi përkujtimore në nderim të heroit Abaz Thaçi dhe 10 dëshmorëve tjerë nga Drenica

Në Qendrën e Kulturës “Hasan Prishtina” në qytetin e Skenderajt është mbajtur akademi përkujtimore në …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara