Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Një propozim i kongresistit republikan amerikan, Keith Self, që Shtetet e Bashkuara të ushtrojnë presion ndaj Greqisë për rishqyrtimin e qëndrimit ndaj Kosovës, nuk ka arritur të marrë mbështetjen e nevojshme në Komitetin për Punë të Jashtme të Dhomës së Përfaqësuesve. Më 13 maj, Self kishte propozuar ndërprerjen e 1.8 milion dollarëve të destinuar për trajnime ushtarake ndërkombëtare për Greqinë, si reagim ndaj mosnjohjes së pavarësisë së Kosovës nga Athina. Megjithatë, amendamenti u kundërshtua nga përfaqësues demokratë dhe republikanë, përfshirë Gregory Meeks, Dina Titus dhe kryesuesin e komitetit Brian Mast. Sipas tyre, programi i ndihmës për Greqinë ka mbështetje dypartiake dhe çështja e Kosovës duhet të trajtohet në mënyrë të veçantë, pa u lidhur me financimet ushtarake. Self argumentoi se mosnjohja e Kosovës nga Greqia dhe disa shtete të tjera të NATO-s po pengon stabilitetin në Ballkanin Perëndimor dhe procesin e integrimit të Kosovës në aleancë. Ai theksoi se Kosova ka treguar përkushtim ndaj vlerave demokratike dhe bashkëpunimit me NATO-n, ndërsa paralajmëroi për rreziqe të ndikimit rus në rajon. Nisma e tij u mbështet nga disa kongresistë, përfshirë Ritchie Torres, i cili ka shprehur hapur mbështetje për anëtarësimin e Kosovës në NATO dhe vazhdimin e pranisë amerikane në misionin KFOR.
