Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Më 7 mars mbahet Akademi Përkujtimore për prof. Ahmet Qeriqin, në 1-vjetorin e ndarjes nga jeta të veprimtarit, të burgosurit politik dhe drejtorit të Radios Kosova e Lirë, Ahmet Qeriqi (1946–2025), më 7 mars 2026 do të mbahet Akademi Përkujtimore në Sallën e Kuqe në Prishtinë, duke filluar nga ora 12:00.
Kjo akademi organizohet për të nderuar jetën dhe veprimtarinë e prof. Ahmet Qeriqit, i cili për dekada me radhë ishte i angazhuar në çështjen kombëtare, në fjalën e lirë dhe në publicistikën shqiptare. Si i burgosur politik në periudha të vështira historike dhe më pas si drejtues i Radios Kosova e Lirë, ai la gjurmë të veçanta në informimin dhe mobilizimin kombëtar gjatë viteve vendimtare për Kosovën.
Akademia do të ketë karakter përkujtimor dhe kulturor. Në program janë paraparë fjalë përkujtimore nga bashkëpunëtorë, miq dhe përfaqësues institucionalë, si dhe reflektime mbi rolin dhe kontributin e tij në jetën publike dhe në historinë më të re të vendit.
Me këtë rast do të bëhet edhe promovimi i dy veprave që autori i ka lënë në dorëshkrim, “Saga e Malmirit” dhe “Vegimtari”, të cilat botohen pas vdekjes së tij dhe përbëjnë një dëshmi të rëndësishme të krijimtarisë së tij letrare dhe mendimit të tij intelektual.
Salla e Kuqe pritet të mbledhë familjarë, veprimtarë, bashkëluftëtarë dhe qytetarë që dëshirojnë të nderojnë figurën, veprën dhe trashëgiminë e prof. Ahmet Qeriqit në këtë përvjetor të parë të ndarjes së tij nga jeta.
