Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Nuk ka shqiptar liridashës në Kosovë, që nuk e njeh veteranin dhe invalidin e UÇK-së, Muhamet Kuka, i cili me flamurin e UÇK-së në duar, është pjesëmarrës i përditshëm, i pa lodhshëm kudo në Kosovë, në aktivitete përkujtimore, në ceremoninë e varrimit të dëshmorëve dhe në tri ditët e ngushëllimeve për ta.
Dhe kudo e shpalos flamurin me qëndrimin plot dinjitet, gjithnjë gatitu, si ushtarak i përjetshëm.
Jo vetëm një ditë, nga Kaçaniku e në Drenicë te Legjendari, jo vetëm me një aktivitet të veteranëve, jo vetëm një muaj apo një vit, por ka më shumë se 20 vite, qyshkur Muhamet Flamurtari shpalos plot dinjitet Flamurin fitimtar e ngadhënjimtar të UÇK-së.
Malësorin me prejardhje nga kreshtat e malet e Kaçanikut legjendar, nuk kemi si të mos e krahasojmë me Marathonomakun e kohës antike, i cili kishte ngarendur me vrap dyzet kilometra për të lajmëruar fitoren e spartanëve kundër persianëve.
Marathonomaku kishte ngarendur vetëm një ditë dhe sapo kishte kumtuar lajmin e fitores kishte ndërruar jetë. Natyrisht se cinikët, mercenarët, anarkistët do të shprehen me skepticizëm për këtë krahasim, por ne po i sheshojmë faktet ato të përditshmet, të veçantat, të vërtetat, ato që kanë ndodhur dhe po ndodhin…
Lufta e UÇK-së ka qenë luftë spartane, luftë e vegjëlisë kundër fuqisë shumëfish më të madhe, luftë idealiste, çlirimtare kundër pushtimit e robërisë.
Dhe kur përmendim luftërat çlirimtare nuk ka si të mos e kujtojmë Nolin e Madh i cili i kishte thurur një poezi, Marathonomakut të kohës antike, që tingëllon aktuale edhe sot, kur po shkruajmë për Marathonomakun e UÇK-së, dinjitarin, Muhamet Kuka:
Rent kudo, duke bërtitur,
Nëpër shekuj faqe-ndritur,
Se i vogli shtrin viganin,
Dhe i shtypuri tiranin,
Veç e tok,
Tok, or Marathonomak!
Është Flamuri i UÇK-së që ndër shekuj do të përkujtojë kohën e fitores historike kundër Tiranisë millosheviqiane.
Është Flamuri i UÇK-së që nuk lejon të harrohet koha kur i shtypuri, mundi tiranin.
Është Flamuri i UÇK-së që bashkoi idealistët e kombit në luftë kundër robërisë, skllavërisë e tiranisë.
Është Flamuri i UÇK-së që është valëvitur e do të valëvitet deri në përjetësi përkrah Flamurit të Skënderbeut dhe Ismail Qemalit, Flamurit kuqezi të të gjithë shqiptarëve.
Muhamet Kuka, Marathonamaku flamurtar i UÇK-së, në mos në librin e Ginisit do të hyjë në enciklopedinë e UÇK-së, si rast sui generis, si rast i veçantë i përkushtimit idealist, flamurtar lirie, bese, nderi e krenarie kombëtare.
Nderim e respekt, Muhamet, nderues dhe respektues i gjakut të derdhur për liri!
Ahmet Qeriqi
Gusht
2023
