Ministri Reçica, në panelin qendror të konferencës regjionale në Berlin

04/07/2018 Institucionet

Ministri i Punës dhe Mirëqenies Sociale Skender Reçica me ftesë të Qeverisë Gjermane po merr pjesë në konferencën e organizuar në Berlin mbi “Dinamikat e reja të teknikave dhe arsimit profesional në Ballkanin Perëndimor“  (New Dynamics of Technical and Vocational Education in the Western Balkans), e cila po zhvillohet në kuadër të procesit të Berlinit për Ballkanin Perëndimor. Në ditë e dytë u mbajt sesioni qendror i kësaj Konference, në të cilën kanë marrë pjesë Ministra nga Ballkani Perëndimor, të cilët i janë drejtuar të pranishmeve në panelin kryesor për të prezantuar përkushtimin e Qeverive të Ballkanit Perëndimor lidhur me arsimin dhe aftësimin profesional si dhe  modernizimin dhe digjitalizimin e Shkollave profesionale. Ndryshimet të cilat po ndodhin me zhvillimin ekonomik, teknologjinë, konkurrencën globale, pritshmëritë e klientëve, përditësimin e kornizës ligjore dhe digjitalizimin janë duke drejtuar kah një ndryshim i tregut të punës. Të gjitha këto sfida duhet të trajtohen dhe kërkojnë një angazhim të thellë me qëllim që të modernizojmë dhe digjitalizojmë sistemin e shkollave të arsimit profesional. Në këtë panel Ministri Reçica theksoi se së bashku me Ministrinë e Arsimit, Shkencës dhe Teknologjisë janë të përkushtuar dhe janë në bashkëpunim të ngushtë që të ngritin nivelin e arsimit dhe trajnimit profesional në Kosovë me qëllim që  profilet e arsimit profesional të jenë në përputhje me nevojat e tregut të punës dhe me këtë të kemi fuqi punëtore profesionale , e cila do të ndikojë në rritjen e zhvillimit ekonomik dhe uljen  e papunësisë. Ministri Reçica gjithashtu theksoi se Qeveria e Kosovës ka hartuar një numër të madh të Dokumenteve Strategjike si: Strategjia Nacionale për Zhvillim, Plani Strategjik për Arsim në Kosovë, Korniza bërthamë e kurrikulave për arsim profesional , Strategjinë Sektoriale të MPMS dhe Planin e Punësimit të të rinjve etj. Gjithashtu janë duke u ndërmarrë veprime konkrete si në vijim: Zhvillimi i standardeve të profilit, zhvillimi i kurrikulave bazuar në kompetenca dhe përditësimi në përputhje me nevojat e tregut të punës, e cila promovon qasje bazuar në kompetenca etj. Vetëm një sistem i fortë i arsimit profesional mund të ul nivelin e papunësisë dhe mund të ngritë nivelin e zhvillimit ekonomik. Nëse nuk kemi fuqi punëtore të kualifikuar në përputhje me nevojat e tregut të punës, atëherë nuk do të kemi as ekonomi të zhvilluar dhe as mirëqenie sociale, theksoi Reçica. Në margjina të kësaj Konference Ministri Reçica i shoqëruar nga Ambasadori Astrit Zemaj, u takua me Sekretaren Parlamentare të Shtetit Federal të Gjermanisë, znj. Maria Flachsbarth dhe gjithashtu pati një takim të veçantë me Ministrat e vendeve të Ballkanit Perëndimor.

Kontrolloni gjithashtu

Komuna e Deçanit nënshkruan marrëveshje bashkëpunimi me kompaninë PMN Sh.P.K

Komuna e Deçanit ka nënshkruar marrëveshje bashkëpunimi me kompaninë PMN Sh.PK. “Nënshkruam kontratën me kompaninë …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara