Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Një kontingjent prej 41 ushtarësh të Ushtrisë Kombëtare të Moldavisë është nisur drejt Kosovës për t’iu bashkuar misionit paqeruajtës të KFOR-it, ku do të shërbejë për një periudhë gjashtëmujore. Paqeruajtësit moldavë do të veprojnë në kuadër të Komandës Rajonale Perëndimore dhe do të vendosen në bazën ushtarake Camp Villaggio Italia në Pejë. Detyrat e tyre do të përfshijnë sigurimin e objekteve ushtarake dhe patrullimin në zonën e përgjegjësisë, në bashkëpunim me trupat e vendeve aleate për ruajtjen e një mjedisi të sigurt dhe të qetë në Kosovë. Para nisjes, ushtarët përfunduan një program të plotë përgatitor me trajnime profesionale brenda dhe jashtë Moldavisë. Pjesë e kontingjentit janë edhe shtatë ushtarake, ndër to lejtnantja Marina Agachi, e cila theksoi se ekipi është i përgatitur moralisht, psikologjikisht dhe profesionalisht për të përmbushur misionin. Moldavia është pjesë e operacionit paqeruajtës të KFOR-it që nga 8 marsi i vitit 2014, duke kontribuar në përpjekjet ndërkombëtare për ruajtjen e stabilitetit dhe sigurisë në Kosovë.
