Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Oda Ekonomike e Kosovës ka reaguar ashpër ndaj njoftimit të Bordit të Zyrës së Rregullatorit të Energjisë për zbatimin e Aktgjykimit të Gjykatës Supreme, duke vlerësuar se ky institucion po vazhdon me interpretime të njëanshme dhe të gabuara të vendimit gjyqësor, si dhe me keqpërdorim të nenit 37, paragrafi 3 të Ligjit për Energjinë Elektrike. Sipas OEK-ut, aktgjykimi i Gjykatës Supreme lidhur me liberalizimin e tregut të energjisë nuk mund të lexohet në mënyrë selektive, pasi një qasje e tillë cenon drejtpërdrejt frymën e vendimit, parimet e sundimit të ligjit dhe sigurinë juridike për bizneset. OEK thekson se Gjykata Supreme, në arsyetimin e saj, ka konstatuar se kriteret e nxjerra nga ZRRE mbi bazën e nenit 37 paragrafi 3 janë të paligjshme, të tejkaluara në kompetencë dhe kanë prodhuar pasoja të drejtpërdrejta ekonomike për bizneset, pa bazë të qëndrueshme ligjore. Vendimet e Gjykatës Supreme nuk janë çështje interpretimi institucional, por akte detyruese që duhet të zbatohen në tërësi dhe në frymën e tyre. Çdo lexim selektiv krijon pasiguri juridike dhe dëmton klimën e biznesit, thuhet në reagimin e OEK-ut.
