Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Organizata e Veteranëve të Luftës së UÇK-së (OVL-UÇK) ka reaguar ashpër ndaj deklarimeve që, sipas tyre, janë bërë ndaj ish-komandantit të UÇK-së Sami Lushtaku nga zyrtari i Lëvizjes Vetëvendosje, Hysni Mehani. Në reagimin e saj për media, OVL-UÇK ka dënuar përdorimin e gjuhës fyese dhe etiketimet që, sipas tyre, e lidhin një gjeneral të UÇK-së me Serbinë, duke i cilësuar si të papranueshme dhe politikisht helmuese. “Ta quash një gjeneral të UÇK-së ‘njeri i Serbisë’ është e ulët dhe e papranueshme”, thuhet në deklaratë, ku organizata thekson se asnjë rivalitet politik nuk mund të justifikojë njollosjen e luftës çlirimtare apo të figurave të saj. OVL-UÇK ka paralajmëruar se fushatat e fyerjeve dhe etiketimeve ndaj veteranëve dhe komandantëve të luftës përbëjnë degradim moral të jetës publike dhe thellim të ndasive shoqërore në vend. Organizata ka kërkuar nga subjektet politike dhe mbështetësit e tyre që të distancohen menjëherë nga gjuha e tillë, duke theksuar se çdo tejkalim i këtij “kufiri” do të përballet me reagim të vendosur dhe të pakompromis.
