Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Presidenti i Serbisë, Aleksandar Vuçiç, ka ngjallur reagime me një veprim që prek drejtpërdrejt trashëgiminë kulturore shqiptare. Gjatë takimit me presidentin e UFC-së, Dana White, në Beograd, Vuçiç i dhuroi atij një instrument tradicional me një tel, të cilin e prezantoi si pjesë të folklorit serb. Sipas raportimeve për takimin, Vuçiç e cilësoi instrumentin si një traditë të vjetër serbe. Por pretendimi ka shkaktuar reagime, pasi bëhet fjalë për lahutën, një instrument me një traditë të lidhur ngushtë me kulturën shqiptare. Në vitin 2025, UNESCO përfshiu në Listën Përfaqësuese të Trashëgimisë Kulturore Jomateriale të Njerëzimit “Artin e të luajturit, kënduarit dhe punimit të lahutës”, pas nominimit nga Shqipëria. Tradita lidhet veçanërisht me komunitetet rurale të Shqipërisë së veriut dhe veriperëndimit. Kjo e bën veprimin e Vuçiçit më shumë sesa një dhuratë simbolike. Paraqitja e një elementi të dokumentuar ndërkombëtarisht si pjesë e trashëgimisë shqiptare si “instrument tradicional serb” shihet si një tjetër përpjekje për ta vendosur një trashëgimi të përbashkët ose të kontestuar në kuadër të narrativës kombëtare serbe. Në këtë rast, dhurata për Dana White-in nuk ishte thjesht një instrument muzikor. Ajo u shoqërua edhe me një mesazh identitar, në një kohë kur Serbia vazhdon të jetë aktive në promovimin e narrativave të veta kulturore në arenën ndërkombëtare. Dhe pyetja mbetet: sa larg mund të shkojë përvetësimi i trashëgimisë kulturore, kur edhe lahuta shqiptare prezantohet si “serbe”?
