Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sot bëhen 19 vite nga rënia e dëshmorit, mjekut të luftës dhe humanistit, Dr. Lec Leci, i njohur si Lec Gradica, i cili ra heroikisht duke shëruar plagët e luftëtarëve dhe popullatës në malet e Qyqavicës. Dr. Leci ishte ndër mjekët e parë që iu bashkua radhëve të Ushtrisë Çlirimtare të Kosovës, duke mos e vënë në diskutim për asnjë moment profesionin e tij prej mantel-bardhi, edhe në kohën kur UÇK vepronte ilegalisht. Por, pas strukturimit të UÇK-së në njësi dhe fillimit të luftës frontale kundër pushtuesit serb, Dr. Leci ishte pjesë e Brigadës 114 në Zonën Operative të Drenicës, duke shëruar plagët e luftëtarëve dhe popullatës civile. Dr. Leci shquhej për thjeshtësi, disiplinë në punë dhe profesionalizëm, i dashur për pacientët, duke mos kursyer për asnjë moment asgjë nga vetja dhe familja, pasi krah të djathtë në punë dhe në kohën e luftës, e kishte edhe bashkëshorten e tij. Dr. Leci lindi në Gradicë të Drenasit, në një familje të shquar për veprimtari atdhetare dhe luftë të pa kompromis në shërbim të çlirimit të atdheut. Lec Gradica i parë, ishte njëri nga luftëtarët e parë të Kosovës që së bashku me Isa Boletinin ndihmuan në shpalljen pavarësisë së Shqipërisë dhe luftuan për ta mbrojtur pavarësinë. Për nderuar veprimtarinë e Dr. Lecit, sot në Varrezat e Dëshmorëve në Polac të Skenderajt bëhen homazhe tek varri i tij, duke filluar nga ora 10:00.
