Ahmeti – Veselit: Dhunë e destabilitet është “shmangia e seancave në emër të ruajtjes së paqes dhe stabilitetit”

Kryetari i PSD-së, Shpend Ahmeti, i është kundërpërgjigjur kryetarit të Kuvendit, Kadri Veseli, që e ka quajtur absurd thirrjen e seancës së jashtëzakonshme nga opozita, për dialogun me Serbinë. Në përgjigjen e tij, Ahmeti ka thënë se dhuna dhe destabiliteti i vërtetë janë “shmangia e seancave në emër të ruajtjes së paqes dhe stabilitetit”. “Kadri Veseli e paska quajtur veprim absurd dhe të panevojshëm thirrjen e seancës së jashtëzakonshme të Kuvendit nga opozita, për dialogun me Serbinë. Kush? Kryetari i Kuvendit. Ku? Në një republikë parlamentare. Kur? Kur Presidenti i vendit (e miku i tij) Hashim Thaçi angazhohet për “korrigjim të kufirit” me një shtet që nuk e njeh sovranitetin dhe integritetin territorial të shtetit tonë, të cilat i paska përmendur Kadri Veseli. Institucionet e shtetit dhe Kushtetuta e Republikës të cilat i paska përmendur Kadri Veseli nuk janë diktakti i pushtetit dhe shpërfillja e opozitës shumicë në Kuvend”, ka shkruar ai. Sipas Ahmetit, është dhunë e sistemit dhe kërcënim për rendin kushtetues e ligjor kur kryekuvendari “kërcënon dhe frikëson opozitën për shkak të ftesës së një seance parlamentare nga opozita”. Kryetari i PSD-së ka shtuar se “në vend të kërcënime të maskuara me leksione mbi demokracinë, Kadri Veseli le ta ftojë seancën. E ka detyrë ligjore, nëse jo vullnet politik”. Ai është zotuar se opozita është e interesuar më shumë se kurrë për të debatuar dhe për të marrë përgjegjës për dialogun.