Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Partitë politike në Kosovë assesi të bëhen unike në fazën finale të dialogut me Serbinë. Opozitarët përpos që nuk e pranojnë kryetarin Hashim Thaçi në krye të këtij dialogu, kërkojnë që njëkohësisht të ndalen bisedimet me shtetin fqinj, pasi që, siç thonë ata, nga negociatat më së shumti ka përfituar Serbia. Në anën tjetër, kryeparlamentari Kadri Veseli para dy ditësh ka kërkuar një unitet nga të gjitha partitë politike në vend në lidhje me çështjen e dialogut mes Kosovës dhe Serbisë. Përmes një videoje në rrjetin e tij social “Facebook” ai ka thënë se status quo-ja lidhur me dialogun është duke e dëmtuar Kosovën dhe se kjo gjendje, siç ka thënë ai, është e papranueshme për Shtetet e Bashkuara të Amerikës dhe Bashkimin Evropian. “Kemi ardhur në një moment kur dallimet tona të brendshme rrezikojnë seriozisht vendin tonë në këtë proces, duke e fuqizuar Serbinë në arenën ndërkombëtare dhe duke e dobësuar Kosovën.Këtë ne nuk duhet ta lejojmë. Me asnjë çmim nuk duhet të lejojmë t’i humbim partnerët tanë ndërkombëtarë, me të cilët kemi ardhur bashkë deri këtu. Nuk duhet të lejojmë që agjendat e brendshme ta dominojnë agjendën shtetërore. Në të kundërtën, mungesa e unitetit dhe kriza potenciale e besimit e ndan Kosovën më shumë përbrenda sesa rreziku nga jashtë”, ka thënë ai.
