Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i komunës së Mitrovicës, Agim Bahtiri, i dënon ashpër aktet kriminale të dëmtimit të katër veturave zyrtare të EULEX-it dhe djegien e veturës zyrtare të prokurorit të Prokurorisë Speciale të Kosovës, Ali Rexha, që kanë ndodhur gjatë natës ndërmjet të së mërkurës dhe të enjtes në Mitrovicë.
“Veprimet e këtilla kriminale, pa marrë parasysh se nga kush mund të jenë bërë ato, për qytetarët e Mitrovicës dhe drejtuesit e komunës në krye me mua, janë të papranueshme, kriminale e të dëmshme, andaj edhe i dënojmë fuqishëm. Përveç se janë drejtuar kundër institucioneve të shtetit dhe atyre ndërkombëtare, këto veprime kriminale mund të kenë pasoja të rënda për komunën e Mitrovicës, ku për herë të parë pas 15 vjetësh pas lufte, kemi po thuaj tërësisht të konsoliduar, të stabilizuar dhe të relaksuar gjendjen politike e të sigurisë”, thotë kryetari Bahtiri.
Ai pasi vlerëson se stabilizimi dhe relaksimi i vazhdueshëm i situatës së sigurisë në komunën e Mitrovicës, është arritur falë punës së madhe dhe të përbashkët të qytetarëve, drejtuesve komunal, shoqërisë civile dhe institucioneve të sigurisë, si atyre vendore, ashtu edhe atyre ndërkombëtare, kërkon nga organet e rendit dhe të hetuesisë që të zbulojnë kryesit e këtyre veprave të ndyra dhe nxitësit e tyre, në mënyrë që të vendosen para drejtësisë për të marrë dënimin e merituar.
Ndërkaq, nga qytetarët mitrovicas, kryetari Bahtiri kërkon që ti ndihmojnë organet e policisë për të identifikuar kryesit e akteve kriminale, piromanët dhe dhunuesit e pronës shtetërore, publike dhe individuale.
