Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari, Hashim Thaçi përmes një postimi të afishuar në profilin e tij në Facebook, e ka quajtur pranimin e Kosovës në UEFA si lajmin më të mirë. “Kosova në UEFA! Lajmi më i mirë i mundshëm për tifozët e panumërt në Republikën tonë. Tash e tutje do të luajmë në kampionate ndërkombëtare – disa lojë do t’i fitojmë, disa do t’i humbim, por kurrë më s’do të na ndalin nga fusha e gjelbër”, thuhet në urimin e kryetarit, Hashim Thaçi.
Kryeministri i vendit, Isa Mustafa ka përgëzuar Kosovën për anëtarësim në UEFA. Ai ka vlerësuar se vendi ynë po përjeton një periudhë të sukseseve të jashtëzakonshme. “Ndihem shumë i lumtur dhe krenar që shteti ynë sapo arriti edhe një sukses kulminant historik. Futbolli i Kosovës nga sot është anëtar i familjes evropiane të futbollit, UEFA-s. Shumë shpejt edhe i FIFA-s. Kosova po përjeton një periudhë të sukseseve të jashtëzakonshme. Rezultatet kulminante, produkt i përkushtimit tonë dhe përkrahjes së miqve ndërkombëtar, do të vazhdojnë në ditët në vijim. Të ndihemi krenar me Atdheun tonë!”, ka shkruar Mustafa në faqen e vet zyrtare në “Facebook”, thuhet në urimin e kryeministrit, Isa Mustafa.
Kryekuvendari, Kadri Veseli ka uruar të gjithë shqiptarët për pranimin e Kosovës në UEFA. Në faqen e tij zyrtare në Facebook, ai ka thënë se sot i erdhi fundi izolimit të futbollit. “Dita e shumëpritur e daljes së futbollit tonë nga izolimi i padrejtë dhe i tejzgjatur, më në fund erdhi. Urime të gjithëve për këtë fitore të madhe për Kosovën! Tanimë jemi anëtarë me të drejta të plota në UEFA dhe futbollistët tanë mund të shpalosin talentin e tyre nëpër stadiumet më prestigjioze ndërkombëtare”, thuhet në shkrimin e kryekuvendarit, Kadri Veseli.
