Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Analisti i shquar nga Shtetet e Bashkuara të Amerikës, Janusz Bugajski ka konstatuar se presidenti i Rusisë, Vlladimir Putin dhe ai i Serbisë, Aleksandër Vuçiq, janë duke luajtur me kartën e Kosovës për të nxitur kriza të reja në Ballkan. Analisti, Janusz Bugajski i ka deklruar mediumit boshnjak “Istraga.ba” se vizita e fundit e ministrit të Brendshëm serb Aleksandar Vulin në Moskë tregon mbështetjen e vendosur të Beogradit për imperializmin rus në këmbim të ndihmës së Kremlinit për “të ngrirë” Kosovën dhe për të mbrojtur Serbinë në rast të një konfrontimi të drejtpërdrejtë me NATO-n. “Përderisa mediat serbe lëshojnë dezinformata të vazhdueshme kundër Kosovës, Vuçiq po riciklon justifikimet që çuan në luftë dhe gjenocid në vitet 1990, kur ai shërbeu si ministër i informacionit i Millosheviqit. Nocioni se serbët janë të persekutuar në Kosovë supozohet të pasqyrojë gjithashtu pretendimet e prodhuara të Rusisë kundër Ukrainës” ka tërhequr vërejtjen analisti i shquar nga Shtetet e Bashkuara të Amerikës, Janusz Bugajski. Ai ka shtuar më tutje se Moska po ndihmon Beogradin në ndërtimin e “Botës serbe”, sipas së cilës të gjithë serbët duhet të jetojnë në një shtet të zgjeruar. Në këmbim, Serbia i mundëson Rusisë të zgjerojë shtrirjen e saj rajonale përmes marrëveshjeve energjetike, depërtimit të inteligjencës, bashkëpunimit ushtarak dhe dezinformimit.
