Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-gjyqtari i Gjykatës Kushtetuese, Kadri Kryeziu, ka komentuar vendimin që pritet më 8 gusht nga Kushtetuesja lidhur me krizën pas moskonstituimit të Kuvendit të Kosovës. Ai paraqiti tre skenarë të mundshëm, duke theksuar se vetëm zgjedhjet mund ta rikthejnë besimin qytetar. Skenari më i mundshëm, sipas tij, është që Presidentja të shpallë zgjedhje të jashtëzakonshme, pasi kriza ka bllokuar formimin e Qeverisë. Skenari i dytë, më pak i dëshirueshëm, do ishte rifillimi i afatit 30-ditor për konstituim. I treti, më i keqi sipas Kryeziut, do ishte transferimi i të drejtës për kryetar Kuvendi te një grup tjetër parlamentar – gjë që ai e sheh si shkelje ligjore. Kryeziu vlerësoi profesionalizmin e përbërjes aktuale të Kushtetueses, duke shprehur bindjen se vendimi do të sjellë qartësi ligjore. Ai kritikoi ashpër edhe ish-kryetarin Enver Hasani, duke e fajësuar për rrëshqitjen institucionale të viteve të fundit. Në fund, Kryeziu theksoi se legjislatura aktuale e ka humbur kredibilitetin dhe se zgjedhjet janë e vetmja rrugëdalje.
