Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Me pikëllim të thellë njoftohet vdekja e Abdi Baletës, ish-ambasador i Shqipërisë në Organizatën e Kombeve të Bashkuara dhe një nga themeluesit e Partisë Demokratike, në moshën 84-vjeçare. Lajmi u bë i ditur nga familjarët përmes një postimi prekës në rrjetet sociale, ku e përshkruan si një burrë të drejtë, të ndershëm dhe të përkushtuar ndaj familjes dhe vendit. “Me pikëllim njoftojmë se sot u nda nga jeta bashkëshorti dhe babai ynë, Abdi Baleta. Për shumëkënd ishte diplomat, gjykatës, politikan, zë i fuqishëm për kombin. Për ne ishte burrë i thjeshtë e i drejtë, bashkëshort, baba e gjysh që na mësoi me shembullin e tij. Dlirësia dhe dinjiteti dhe forca e karakterit ishin tiparet e tij”, shkruan vajza e tij, duke përfunduar me: “Qoftë kujtimi i tij i bekuar për të gjithë ne që e deshëm. Pastë dritë shpirti yt, babi”. Abdi Baleta lindi në fshatin Gur i Bardh të Matit në vitin 1941. Ai studioi marrëdhënie ndërkombëtare në Moskë dhe përfundoi drejtësinë në Universitetin e Tiranës, në vitin 1964. Karriera e tij diplomatike përfshinte shërbimin në Ministrinë e Jashtme të Shqipërisë, si punonjës dhe drejtor, si dhe detyrën e ambasadorit dhe përfaqësuesit të Shqipërisë në OKB, në New York. Përveç karrierës diplomatike, Baleta shërbeu si Kryetar i Gjykatës së Rrethit në Pogradec (1983–1987) dhe më pas si pedagog i së drejtës ndërkombëtare në Fakultetin e Drejtësisë (1987–1995), duke lënë pas një trashëgimi të pasur akademike dhe diplomatike.
