Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Mediat ndërkombëtare raportojnë se Kosova po përballet me një krizë të re politike pas dështimit të kryeministrit në detyrë, Albin Kurti, për të siguruar mbështetje parlamentare për formimin e qeverisë së re. Sipas tyre, kjo situatë mund ta çojë vendin drejt zgjedhjeve të parakohshme. Bloomberg thekson se vendimi i Kuvendit u mor në orët e fundit të afatit kushtetues për krijimin e qeverisë, dhe thekson rrezikun e bllokimit të buxhetit dhe vonesave në pagat publike, pensionet dhe furnizimet mjekësore, nëse nuk formohet një administratë funksionale. TRT World raporton se vendi mbetet pa qeveri funksionale pothuajse nëntë muaj pas zgjedhjeve të shkurtit, ndërsa presidentja duhet të shpallë një kandidat tjetër për votim të dytë në parlament. Nëse as ky votim nuk arrin shumicën e nevojshme, Kosova mund të detyrohet të organizojë zgjedhje të reja parlamentare. Lidhja Demokratike e Kosovës, një nga partitë kryesore opozitare, e ka fajësuar drejtpërdrejt Kurtin për bllokimin politik. Kryetari i saj, Lumir Abdixhiku, ka deklaruar se vendi po shkon drejt zgjedhjeve të jashtëzakonshme. Situata e tensionuar politike në Kosovë vazhdon të monitorohet gjerësisht nga mediat ndërkombëtare, të cilat theksojnë pasojat potenciale të mosformimit të qeverisë për stabilitetin dhe funksionimin e institucioneve shtetërore.
