Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në një intervistë të thelluar për “Süddeutsche Zeitung”, ish-ministri i Jashtëm gjerman, Joschka Fischer, rikthehet tek një nga momentet më vendimtare të politikës europiane – ndërhyrja e NATO-s në Kosovë, duke e mbrojtur qartë dhe pa ekuivoke angazhimin e tij të fundviteve ’90 për çlirimin e popullit shqiptar nga represioni i Beogradit. Ai thekson se vendimi i tij nuk ishte taktik, por i rrënjosur në një parim moral: solidaritet me viktimat dhe kundërshtim ndaj agresionit. I pyetur se si arriti t’i bindte të Gjelbrit të hiqnin dorë nga pacifizmi tradicional, Fischer u përgjigj prerë: “Nuk jam njeri që predikon t’i kthesh faqen tjetër kur goditesh. Liria kërkon që të jesh në anën e atyre që luftojnë për të. Hitlerin nuk e mundën njerëzit që rrinë këmbëkryq”. Në këtë frymë, ai rikujtoi se ndërhyrja në Kosovë nuk ishte vetëm akt politik, por provë morale dhe e vetmja votë madhore që ai arriti ta fitonte brenda një partie ku shpesh kishte humbur shumicën. Fischer vlerëson se paqeja afatgjatë nuk ndërtohet mbi iluzione. Sipas tij, Gjermania, e rritur për dekada nën ombrellën e sigurisë amerikane, është bërë “pacifiste strukturore”, por realiteti i sotëm kërkon lidership të ri dhe vendime të maturuara. Europa, thotë ai, duhet të mendojë për mbrojtjen dhe aftësinë e saj strategjike përtej kufijve të BE-së: me Britaninë, Norvegjinë dhe me shtyllën e qëndrueshme të NATO-s – për aq kohë sa kjo aleancë mbetet e pacenueshme. Në fund, Fischer tingëllon paralajmërues: një Europë e zhytur në nacionalizma do të ishte katastrofale – politikisht, ekonomikisht dhe gjeostrategjikisht. Pa unitet, thotë ai, kontinentit i humbet pesha globale dhe bie në margjinalizim. Prandaj, për të, mësimi nga Kosova, nga historia dhe nga sfidat e sotme është i qartë: liria dhe siguria mbrohen me vendime të guximshme, jo me heshtje.
