Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sekretarja e Përgjithshme e PDK-së, Vlora Çitaku, ka reaguar ashpër ndaj bisedave të publikuara nga VOX Kosova, të cilat zbulojnë komunikimet mes Dejona Mihailit, ministres Artane Rizvanolli dhe Faruk Mujkës për punësimin e këtij të fundit në mënyrë të paligjshme si Kryeshef Ekzekutiv i Ndërmarrjes Hidroekonomike Ibër-Lepenci. Sipas Çitakut, këto biseda e dëshmojnë “në mënyrë të pakontestueshme kontrollin e hekurt të Dejonës mbi çdo institucion, çdo ndërmarrje dhe çdo vendim” në Kosovë. Ajo thekson se bëhet fjalë për një person “pa asnjë legjitimitet demokratik”, i cili, sipas saj, është pajisur me pushtet absolut nga kryeministri Albin Kurti. “Një njeri pa asnjë legjitimitet demokratik, i veshur me pushtet nga lideri suprem, vendos se kur ndalet rryma, kush udhëheq borde e ndërmarrje publike dhe madje se çfarë deklaratash duhet të publikojnë deputetët e VV-së”, ka shkruar Çitaku në Facebook, duke iu referuar edhe bisedave të mëhershme me zyrtarë tashmë të përfshirë në procese penale. Në fund, ajo paralajmëron ndryshim politik, duke theksuar se 28 dhjetori do të jetë dita e përballjes së kësaj qeverisjeje me verdiktin qytetar. “Është dita kur kjo mendësi do të marrë fund. Është dita kur qytetarët do t’i japin përgjigjen e merituar arrogancës, kapjes dhe abuzimit me pushtetin”, përfundoi ajo.
