Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Asociacioni i Komunave të Kosovës, ka kërkuar një angazhim më të madh dhe më të koordinuar të nivelit qendror në mbështetje të komunave, veçanërisht pas vërshimeve të fundit që kanë shkaktuar dëme të konsiderueshme në ekonomi familjare, biznese dhe infrastrukturë. Drejtori ekzekutiv i AKK-së, Sazan Ibrahimi, ka deklaruar se bashkëpunimi ndërmjet nivelit qendror dhe atij lokal është bërë i domosdoshëm, duke propozuar edhe krijimin e një fondi emergjent në nivel lokal për përballimin e situatave të tilla. Sipas tij, ky fond do të ndihmonte në tejkalimin e vonesave të gjata në rimbursimin e dëmeve, me të cilat po përballen qytetarët dhe bizneset prej vitesh. Ibrahimi ka sqaruar se komisionet komunale për vlerësimin e dëmeve tashmë kanë filluar punën, por procesi i verifikimit dhe miratimit në nivel qendror, konkretisht në Agjencinë e Emergjencave, po zvarritet tej mase. Ai ka theksuar se në disa komuna ende nuk janë kompensuar dëmet nga vërshimet e viteve të kaluara. Sipas tij, fenomenet natyrore si vërshimet dhe zjarret janë bërë më të shpeshta për shkak të ndryshimeve klimatike, ndërsa sanimi i dëmeve në infrastrukturë ka çaluar në disa raste. Ai ka përmendur shembuj konkretë, si Komuna e Klinës, e cila ka ndërmarrë masa parandaluese me të hyrat vetanake, si dhe Komunën e Malishevës, ku gjendja e digës në lumin Mirusha ka ngritur shqetësime serioze. Ibrahimi ka kërkuar që pas stabilizimit të situatës, niveli qendror dhe komunat të identifikojnë bashkërisht “pikat e nxehta” që rrezikojnë përmbytje të përsëritura dhe të intervenohet në kohë, përfshirë digat, shtretërit e lumenjve dhe infrastrukturën mbrojtëse.
