Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Numërimi mbrapsht për zgjedhjen e presidentit të Kosovës ka nisur, ndërsa partitë politike vazhdojnë të lënë hapur kartat dhe të shmangin qëndrimet e qarta publike. Edhe pse posti i presidentit në një demokraci parlamentare ka rol të kufizuar ekzekutiv, në praktikë ai mbetet pikë kyçe e pazareve politike dhe balancave të pushtetit. Presidentja aktuale, Vjosa Osmani, ka shprehur hapur synimin për një mandat të dytë, por mbështetja parlamentare për të mbetet e paqartë. Lëvizja Vetëvendosje e ka renditur zgjedhjen e presidentit si prioritet të katërt, duke lënë të kuptohet se vendimi final do të lidhet me zhvillimet e tjera institucionale dhe presionin ndaj opozitës. Njohës të proceseve politike vlerësojnë se kjo taktikë synon të shtyjë palët drejt një zgjidhjeje nën presion afati. Opozita, ndërkohë, flet për nevojë konsensusi, por pa emra konkretë, ndërsa AAK ka përmendur mundësinë e një kandidature nga radhët e veta. Minoritetet joshumicë kanë sinjalizuar gatishmëri për të votuar kandidatin e shumicës. Nëse deri më 4 mars nuk zgjidhet presidenti, vendi rrezikon zgjedhje të reja dhe bllokadë financiare e institucionale. Përkundër rrezikut, skena politike vazhdon të dominohet nga kalkulime taktike, jo nga transparencë dhe marrëveshje e hapur.
