Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
UÇK-ja ka qenë dhe do të mbetet përjetësisht nderi dhe krenaria e kombit shqiptar!
UÇK-ja është simbol i heroizmit, i dinjitetit dhe i krenarisë kombëtare shqiptare, dhe e tillë do të mbetet në përjetësi. Aty u radhitën bijtë dhe bijat më të mirë të kombit shqiptar, të cilët morën me vete rrezikun, dhuruan jetën e tyre dhe luftuan për lirinë dhe çlirimin e Kosovës.
Ata nuk luftuan për lavdi apo përfitime personale, por për të çliruar popullin shqiptar të Kosovës nga zgjedha e shovinizmit serb. Askush nuk ka të drejtë ta mohojë apo të zvlerësojë lavdinë e UÇK-së për kredo politike apo për përfitime personale. Ajo lindi, u rrit dhe u fuqizua në gjirin e luftës së popullit për liri.
Bijtë dhe bijat më të mirë të kombit shqiptar morën armët për të vdekur për lirinë e Kosovës. Heroi i kombit, Fehmi Lladrovci, ka thënë: “Sikur edhe 100 jetë të kisha, me dëshirë do t’i jepja për lirinë e Kosovës,” të cilën së bashku me luftëtaren e lirisë, Xhevë Lladrovci, e dhanë në mënyrë legjendare.
Pra, liria dhe pavarësia e Kosovës u shkruajt dhe u vadit me gjakun e pastër të vajzave dhe djemve të UÇK-së, të cilët dhanë jetën e tyre në lule të rinisë. A mund të zvenitet epopeja e lavdishme e familjes Jashari? Absolutisht jo! Kjo është e pafalshme nëse guxon kush ta bëjë këtë për kredo politike apo për t’i shërbyer antishqiptarëve.
Fatkeqësisht, sot ndodhen të mbyllur në Gjykatën Speciale komandantët e UÇK-së, të cilët me përkushtim dhe heroizëm udhëhoqën luftën për çlirimin e Kosovës nga shovenët serb. Ata padrejtësisht akuzohen për krime lufte. Lind pyetja: pse? A kanë bërë krime ata? Absolutisht jo! Ata po bëjnë vetëm një “krim”: luftuan për lirinë e popullit shqiptar.
Nëse quhet krim kjo luftë, ndryshon puna; por të luftosh për lirinë e popullit tënd nuk është krim, përkundrazi, shpreh patriotizëm, humanizëm dhe heroizëm. Prandaj, krerët e UÇK-së janë të pafajshëm. Por këtë e bëjnë antishqiptarët dhe keqdashësit, të cilët, duke akuzuar komandantët e UÇK-së, përpiqen të zvogëlojnë imazhin e saj apo të mohojnë rolin e saj.
Por, sa të përpiqen, nuk mund të errësojnë shkëlqimin e saj. UÇK-ja është shkruar me shkronja të arta në ndërgjegjen kombëtare shqiptare. Ajo është dhe do të mbetet përjetësisht e lavdishme, sepse lufta që bënte UÇK-ja, e ndihmuar nga populli, ishte një luftë e drejtë dhe e lavdishme.
Sa i lavdishëm ishte ideali i tyre, aq e lavdishme ishte lufta për lirinë dhe pavarësinë e atdheut, që padrejtësisht ua kishin nëpërkëmbur shovinistët serb. Për të cilën është derdhur shumë gjak për fitoren e lirisë së ëndërruar në shekuj.
Kjo është një e vërtetë e pamohueshme dhe e pakontestueshme.
Lavdi të përjetshme UÇK-së!
Lavdi dëshmorëve dhe heronjve të kombit shqiptar!
Lavdi luftës heroike të luftëtareve të UÇK-së!
Lavdi komandantit të UÇK-së, Adem Jashari – simbol i trimërisë, i qëndresës dhe i heroizmit shqiptar!
Lavdi luftës dhe kontributit të paçmuar të komandantëve të UÇK-së!
