Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Gjykata Kushtetuese e Kosovës ka bërë të ditur se vendimi përfundimtar lidhur me dekretin e presidentes Vjosa Osmani do të merret vetëm pasi të shqyrtohen në detaje të gjitha aspektet kushtetuese të pretendimeve të paraqitura. Në një përgjigje zyrtare, Gjykata thekson se procesi po zhvillohet në përputhje me Kushtetutën, Ligjin për Gjykatën Kushtetuese dhe Rregulloren e punës, por pa dhënë një afat konkret kohor për marrjen e vendimit – një paqartësi që po shton tensionin politik në vend. Ndërkohë, masa e përkohshme e vendosur nga Kushtetuesja, e cila skadon më 31 mars, vazhdon të mbajë të ngrira veprimet institucionale. Me këtë vendim, i ndalohet presidentes çdo veprim lidhur me dekretin e 6 marsit për shpërndarjen e Kuvendi i Kosovës, ndërsa njëkohësisht edhe Kuvendi nuk mund të ndërmarrë veprime deri në një vendim përfundimtar. Gjykata ka arsyetuar se kjo masë është e domosdoshme për të parandaluar “dëme të pariparueshme” për rendin kushtetues dhe funksionimin demokratik të institucioneve kyçe në vend. Megjithatë, mungesa e një afati të qartë për vendimmarrje po kritikohet si zvarritje që rrezikon të thellojë krizën institucionale, duke lënë Kosovën në një situatë të paqartë politike në një moment të ndjeshëm për stabilitetin e saj demokratik.
