Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Rritja e vazhdueshme e çmimeve dhe inflacioni në rritje kanë thelluar përplasjet politike në Kosovë, ku opozita akuzon qeverinë për neglizhencë dhe mungesë të plotë reagimi ndaj krizës ekonomike. Shefi i grupit parlamentar të AAK-së, Besnik Tahiri, ka ngritur alarmin duke deklaruar se institucionet janë pasive përballë një krize që po rëndon çdo ditë jetën e qytetarëve. Sipas tij, ndryshe nga vendet e rajonit dhe Bashkimi Evropian, Kosova nuk ka ndërmarrë asnjë hap konkret për të zbutur pasojat e rritjes së çmimeve. Në të njëjtën linjë, deputetja e LDK-së, Hykmete Bajrami, theksoi se rritja e çmimit të naftës po prodhon efekt zinxhir në të gjithë ekonominë, duke goditur drejtpërdrejt produktet bazë. Ajo kërkoi masa urgjente fiskale, përfshirë uljen e TVSH-së dhe akcizës, duke kritikuar qeverinë për mungesë konsultimesh me sektorin privat. Sipas opozitës, mungesa e një pakete konkrete ekonomike tregon paaftësi menaxhuese dhe indiferencë ndaj krizës, ndërsa paralajmërohet se situata mund të përkeqësohet edhe më tej nëse nuk ndërhyhet menjëherë.
