Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Visar Azemi nga Lidhja Demokratike e Kosovës ka ngritur alarmin për një skandal serioz në sektorin e energjisë elektrike, duke akuzuar për manipulim sistematik të njehsorëve që, sipas tij, po i faturojnë qytetarët me tarifa më të larta se ato reale. Sipas Azemit, nga një hulumtim i kryer në rreth 900 njehsorë në Prishtinë dhe Ferizaj, 87% e tyre rezultojnë të kenë devijime të mëdha në matjen e kohës, duke e zhvendosur konsumimin në orare me tarifa më të shtrenjta. Ai thekson se kjo nuk mund të konsiderohet si gabim teknik, por si një skemë e mundshme manipulimi që u ka kushtuar qytetarëve miliona euro. Azemi akuzon drejtpërdrejt kompaninë KEDS dhe Zyra e Rregullatorit të Energjisë për dështim dhe bashkëpërgjegjësi, duke thënë se qytetarët po paguajnë energjinë me tarifa të shtrenjta edhe në orët kur duhet të vlejë tarifa e ulët. Diferenca në çmim, sipas tij, arrin mbi 100%, duke e rënduar drejtpërdrejt buxhetin familjar. Ai kërkon hetim të pavarur dhe auditim forenzik të sistemit të faturimit, si dhe dorëheqjen e menjëhershme të bordit të ZRRE-së, duke insistuar që përgjegjësit të përballen me pasoja ligjore. Ky denoncim ka ngritur pikëpyetje serioze mbi integritetin e sistemit energjetik dhe mbrojtjen e konsumatorëve në Kosovë.
