Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Të dhënat më të fundit nga tregtia e jashtme e mallrave tregojnë se ekonomia e Kosovës vazhdon të përballet me një hendek të thellë mes importit dhe eksportit. Në mars 2026, deficiti tregtar arriti në 563,5 milionë euro, duke shënuar rritje prej 5,2 % krahasuar me të njëjtën periudhë të vitit të kaluar. Gjatë këtij muaji, eksportet kapën vlerën prej 88,4 milionë euro, ndërsa importet arritën në 651,8 milionë euro, çka tregon qartë varësinë e lartë të vendit nga mallrat e huaja. Edhe pse eksportet shënuan rritje prej 18,2 %, ato mbulojnë vetëm 13,6 % të importeve, duke dëshmuar për një strukturë të dobët prodhuese dhe eksportuese. Importet vazhdojnë të dominohen nga produktet minerale, makineritë dhe pajisjet mekanike e elektrike, ushqimet e përpunuara, pijet e duhani, si dhe mjetet e transportit. Në anën tjetër, eksportet mbështeten kryesisht në metalet bazë dhe produktet e tyre, të ndjekura nga plastika, goma, ushqimet e përgatitura dhe tekstili. Sa i përket partnerëve tregtarë, vendet e Bashkimi Evropian mbeten kyçe, duke përbërë 33,2 % të eksporteve dhe 43,6 % të importeve. Ndërkohë, vendet e CEFTA përbëjnë pjesën më të madhe të eksporteve me 46,2 %, me rritje të ndjeshme prej 21,8 %. Partnerët kryesorë eksportues përfshijnë Gjermania, Italia dhe Holanda në kuadër të BE-së, si dhe Maqedonia e Veriut, Shqipëria dhe Serbia në kuadër të CEFTA-s. Në anën tjetër, importet dominohen nga Gjermania, Italia dhe Polonia nga BE-ja, si dhe Kina dhe Turqia nga vendet e tjera. Këto shifra konfirmojnë se, pavarësisht rritjes së eksporteve, ekonomia e Kosovës vazhdon të mbetet e orientuar drejt konsumit dhe importit, ndërsa sfidë kryesore mbetet rritja e prodhimit vendor dhe forcimi i konkurrueshmërisë në tregjet ndërkombëtare.
