Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Partia Demokratike e Kosovës duket se po e ri formaton strategjinë e saj politike, duke i kthyer shpinën figurave të konsumuara dhe duke sinjalizuar qartë se aleancat e vjetra nuk janë më prioritet. Deklarata e Vlora Çitakut se përfshirja e Fatmir Limajt nuk është as temë diskutimi në parti, tregon për një vijë të prerë brenda PDK-së. Çitaku e bëri të qartë se fokusi i PDK-së është ndërtimi i një liste “gjithëpërfshirëse”, por në thelb me emra të rinj. Mesazhi i saj ishte i drejtpërdrejtë: politika në Kosovë ka nevojë për rifreskim, ndërsa shumë figura – përfshirë edhe vetë atë, kanë qëndruar gjatë në skenë. Megjithatë, pas retorikës për hapje dhe përfshirje, fshihet një realitet më i ashpër politik. Refuzimi kategorik i një bashkëpunimi me Limajn nuk është vetëm çështje “figurash të reja”, por edhe një përpjekje për të rikonfiguruar balancat brenda kampit politik që dikur ndante të njëjtën bazë elektorale. Fakti që, sipas Çitakut, kjo çështje “nuk është temë fare” në strukturat e partisë, ndërkohë që diskutohet gjerësisht në publik, tregon për një hendek mes perceptimit publik dhe vendimmarrjes reale brenda partive. Në prag të zgjedhjeve të 7 qershorit, kjo qasje e PDK-së mund të lexohet si tentativë për t’u distancuar nga e kaluara dhe për të ndërtuar një identitet të ri politik.
