Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-presidenti i Kosovës, Hashim Thaçi, në një intervistë për emisionin “Opinion”, ka kritikuar procesin gjyqësor ndaj tij në Hagë, duke e cilësuar si të devijuar nga misioni i drejtësisë. Ai, duke iu referuar edhe vlerësimeve të ekspertëve ndërkombëtarë, ka theksuar se gjykata duhet të garantojë drejtësi të paanshme dhe jo, siç u shpreh ai, “hakmarrje të bazuar në mashtrim”. Thaçi ka deklaruar se po kalon vitin e gjashtë në izolim pa një vendim përfundimtar, duke e përshkruar këtë periudhë si një shkëputje të gjatë nga jeta familjare dhe publike. Megjithatë, ai ka shprehur besim se, pas dëgjimit të dëshmitarëve të të dyja palëve, gjykata do të marrë një vendim të drejtë dhe meritor. Në intervistë, ai ka theksuar se procesi nuk lidhet vetëm me fatin e tij personal, por edhe me historinë e Kosovës dhe luftën për liri, duke shtuar se kjo çështje ka rëndësi më të gjerë për drejtësinë ndërkombëtare. Thaçi ka kërkuar që procesi të jetë transparent, me respektim të plotë të të drejtave të njeriut, barazisë së palëve dhe ligjeve mbi të cilat është themeluar gjykata. Duke folur për përditshmërinë në paraburgim, ai e ka përshkruar izolimin si sfidë të rëndë psikologjike, por ka theksuar se përpiqet të ruajë qëndrueshmërinë përmes disiplinës personale dhe reflektimit. Në fund, ai ka theksuar se beson në pafajësinë e tij dhe se historia e Kosovës, sipas tij, nuk mund të rishkruhet apo zbehet nga proceset gjyqësore, duke e cilësuar rezistencën për liri si themel të identitetit dhe shtetësisë së vendit.
