Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ka ndërruar jetë komandanti i Ushtrisë Çlirimtare të Kosovës, Sahit Jashari, nga Prekazi i Skenderajt, njëri ndër themeluesit dhe luftëtarët e parë të UÇK-së, si dhe bashkëluftëtar i Komandantit Legjendar, Adem Jashari.
Lajmi për vdekjen e tij është bërë i ditur nga familja Jashari, e cila e kujtoi me krenari për veprimtarinë, guximin dhe kontributin e tij në shërbim të atdheut.
Për ndarjen e tij nga jeta kanë reaguar edhe bashkëluftëtarë e personalitete politike. Kryetari i Komunës së Skenderajt dhe bashkëluftëtari i tij, Sami Lushtaku, e cilësoi Sahit Jasharin si një nga burrat më të mëdhenj të kësaj toke, luftëtar të orëve të para të UÇK-së dhe simbol të sakrificës për lirinë e Kosovës. Ndërkaq, kryetari i BDI-së në Maqedoninë e Veriut dhe bashkëluftëtari i tij, Ali Ahmeti, e përkujtoi si patriot, atdhetar dhe një nga luftëtarët e parë që qëndroi krah Adem dhe Hamzë Jasharit në rrugën e lirisë.
Komuna e Skenderajt ka njoftuar se ceremonia e varrimit do të organizohet nën përkujdesjen e kryetarit Sami Lushtaku. Homazhet do të mbahen më 12 qershor në Palestrën “Ilaz Kodra” në Skenderaj, ndërsa varrimi do të zhvillohet në ora 16:00 në varrezat e lagjes Jashari në Prekaz.
Sahit Jashari mbetet një nga figurat e rëndësishme të rezistencës shqiptare dhe të luftës çlirimtare të Kosovës, duke lënë pas një trashëgimi të çmuar patriotike dhe kombëtare.
