Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Natyra Kuçi, shoqe e Arlinda Zekajt, ka rrëfyer përpjekjet e saj për të gjetur siguri dhe për t’u kthyer e qetë në shtëpi pranë djalit, duke ngritur pikëpyetje të rënda për dështimin e institucioneve në mbrojtjen e saj. Kuçi tha se Arlinda kishte kërkuar ndihmë disa herë në polici, por nuk e kishte humbur shpresën se situata do të përmirësohej. Edhe pas vendimit të gjykatës dhe arrestimit të bashkëshortit të saj, ajo besonte se do të mund të rikthehej në jetën e saj pranë të birit. “Linda nuk ka hequr dorë. Linda nuk ka zgjedhur të sakrifikohet atë ditë, ajo ka shpresuar që pasi u arrestua burri i saj, do të shkojë e qetë në shtëpi te djali i vet”, ka deklaruar Kuçi. Sipas saj, Arlinda kishte shpresuar se kthimi i bashkëshortit nga Amerika dhe zhvillimet gjyqësore do t’ia mundësonin ribashkimin me djalin. Por kjo shpresë nuk u realizua. Kuçi ka kritikuar zinxhirin institucional, duke vënë në pikëpyetje mënyrën se si u trajtua situata e Arlindës dhe pse ajo nuk arriti të ndiente siguri në shtëpinë që kishte ndërtuar me bashkëshortin. Arlinda Zekaj kërkoi ndihmë dhe vazhdoi të besonte se mund të jetonte e qetë me djalin e saj. Vrasja e saj tashmë kërkon përgjigje të qarta: a u vlerësua siç duhej rreziku me të cilin përballej dhe a u ndërmorën të gjitha masat e nevojshme për ta mbrojtur?
