Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Profesori i politikës së jashtme në Universitetin Johns Hopkins, Daniel Serwer, ka kritikuar dhunën gjatë protestave të fundit në Tiranë, duke paralajmëruar se përshkallëzimi i situatës mund të sjellë destabilizim të vendit. Në një intervistë për Top Channel, Serwer ka thënë se protestat janë legjitime në një shoqëri demokratike, por dhuna po e dëmton mesazhin e protestuesve dhe po e diskrediton lëvizjen. Ai ka kujtuar përvojën e tij në Shqipëri më 1997, pas rënies së skemave piramidale, duke theksuar se protestat e dhunshme mund të kenë pasoja serioze për stabilitetin e vendit. “Çdo lloj ndryshimi duhet të vijë përmes votës në rrugë paqësore, jo të dhunshme”, ka deklaruar Serwer. Duke komentuar thirrjen e Sali Berishës për mosbindje civile, profesori amerikan ka theksuar se kjo formë rezistence duhet të jetë paqësore dhe nuk duhet të shndërrohet në përplasje me forcat e sigurisë. Sipas tij, dhuna nuk mund të shërbejë si mjet për largimin e kryeministrit Edi Rama. Serwer ka shprehur gjithashtu rezerva për jetëgjatësinë e udhëheqësve politikë në Ballkan, duke thënë se rajonit i nevojitet një udhëheqje e re. I pyetur për pretendimet e Ramës se pas protestave qëndrojnë “duar të huaja”, Serwer ka thënë se nuk ka informacion të mjaftueshëm për të dhënë një përgjigje të prerë. Ai ka theksuar se dhuna mund ta vështirësojë rrugën e Shqipërisë drejt anëtarësimit në Bashkimin Evropian. Në intervistë, Serwer ka shprehur shqetësim edhe për qëndrimin e administratës amerikane ndaj integrimit evropian të Ballkanit Perëndimor, duke vlerësuar se mbështetja e vazhdueshme e SHBA-së për këtë proces ka qenë historikisht e rëndësishme.
