Ganimete Musliu: Gërvalla, Haxhiu e Sveçla po përdorin mërgimtarët për përfitime partiak

Ganimete Musliu, deputete e Partisë Demokratike të Kosovës, ka reaguar ashpër ndaj veprimit të tre ish-ministrave të Qeverisë Kurti – Donika Gërvalla, Albulena Haxhiu dhe Xhelal Sveçla – të cilët gjatë qëndrimit të tyre në Shqipëri, me rastin e festimeve të 28 Nëntorit, u kanë bërë thirrje mërgimtarëve që të kthehen në Kosovë më 28 dhjetor për të votuar.

Në reagimin e saj, Musliu i cilëson tre ish-ministrat si “mashtrues dhe manipulatorë”, duke theksuar se sipas saj, thirrjet e tyre nuk janë asgjë më shumë sesa një përpjekje e dëshpëruar e pushtetit aktual për të ndikuar politikisht në votën e mërgatës. Ajo pretendon se udhëtimi i tyre në Shqipëri dhe videot publike që i shoqëruan ato paraqitje, nuk kanë të bëjnë me festën kombëtare, por me frikën e humbjes në zgjedhjet e ardhshme.

Sipas Musliut, paniku ka përfshirë bartësit e dikurshëm të këtyre dikastereve, të cilët – siç shprehet ajo – po përpiqen t’i shfrytëzojnë mërgimtarët për interesa të ngushta partiake, duke i bërë thirrje të kthehen në Kosovë për të mbështetur qeverinë në largim. Në reagimin e saj, ajo u bën thirrje qytetarëve që të mos bien pre e, siç i quan ajo, “manipulimeve të pushtetit”, duke nënvizuar se PDK-ja do të jetë e gatshme ta rikthejë procesin politik në binarë demokratikë.