Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Lëvizja Revolta ka zhvilluar një aksion simbolik para Ministrisë së Punëve të Brendshme, duke shprehur pakënaqësinë ndaj mungesës së transparencës lidhur me trajtimin e aplikimeve për shtetësinë e Republikës së Kosovës. Gjatë aktivitetit, aktivistët vendosën pankarta pranë objektit të ministrisë me mesazhe kritike drejtuar institucioneve shtetërore, si: “Nuk ka shtet pa llogaridhënie”, “Heshtja e ministrisë është alarm” dhe “Institucionet nuk janë pronë private”. Sipas organizatorëve, qëllimi i aksionit ishte të kërkohet përgjegjësi institucionale dhe informim i qartë për qytetarët që presin përgjigje për kërkesat e tyre për shtetësi. Aktivistët tentuan të vendosnin simbole protestuese edhe brenda oborrit të MPB-së, por u penguan nga një zyrtar policor, i cili nuk lejoi vazhdimin e këtij veprimi. Nga Ministria e Punëve të Brendshme nuk pati reagim të menjëhershëm lidhur me kërkesat e paraqitura gjatë aksionit. Ky aktivitet rikthen në vëmendje debatin mbi transparencën, efikasitetin institucional dhe të drejtën e qytetarëve për të marrë përgjigje në kohë nga organet publike.
