Fillimi / Intervista / Intervistë me kryetarin e komunës së Prishtinës, Shpend Ahmeti

Intervistë me kryetarin e komunës së Prishtinës, Shpend Ahmeti

RKL: Z. Ahmeti fillimisht ju përgëzojmë për zgjedhjen në postin e kryetarit  të Prishtinës. Për shumë kë  ishte një mision thuajse i pamundur, por megjithatë ju ia dolët ta sfidoni kryetarin, Isa Mustafa dhe LDK-në, e cila e ka pasur si bastion të përhershëm Prishtinën. Si e komentoni këtë fitore?

Ahmeti: E kam thënë edhe më herët se kjo fitore u bë e mundshme pikërisht pse njerëzit filluan të besonin se ndryshimi mund të ndodh. Siç e thatë edhe ju, për shumicën e njerëzve ishte e pamundur të mendohej se mund të ndodhte një ndryshim i tillë, por kur njerëzit filluan të besojnë atëherë i tejkaluan edhe vijat partiake. Mendoj se kanë qenë shumë faktorëqë kanë rezultuar në këtë fitore dhe sikur njëri nga këta faktor të mungonte, do të ishte më vështirë. Përkushtimi i aktivistëve, arroganca e pushtetit të kaluar, balotazhi si dhe besimi i votuesve të subjekteve të tjera, përfshirë edhe ata të LDK-së, të gjitha bashkë e kanë bërë të mundshme fitoren.

RKL: Është folur shpesh se fitorja në Prishtinë i atribuohet më shumë Shpendit sesa Vetëvendosjes. Duket se këtë bindje e ka ushqyer fakti që njerëzit që dikur ishin pjesë e FER-it ishin më të votuar sesa ata që ishin në Vetëvendosje më herët. Si e komentoni një thënie të tillë?

Ahmeti: Nuk mund të thuhet as fitorja e Shpendit dhe as fitorja e Vetëvendosjes. Edhe puna që kemi bërë në Lëvizjen ‘Vetëvendosje’, të jep një vulë të ndershmërisë dhe pastërtisë. Poashtu këtu ka rol edhe vullnetarizmi i aktivistëve, meqë këtë fushatë e kemi zhvilluar me më pak se 60 mijë euro. As nuk paramendohej që me aq pak fonde të fitohet gara. Ka qenë edhe programi, por edhe kandidatura ime e cila është mirëpritur nga votuesit. Pa Vetëvendosjen unë nuk do të mund të fitoja e ndoshta edhe Vetëvendosja pa mua nuk do të fitonte. Mendoj se këto analiza janë të tepërta për shkak se në përgjithësi i takoj subjektit politik të Vetëvendosjes, por tash në të njëjtën kohë jam edhe kryetar i të gjithë qytetarëve të Prishtinës, jo vetëm i votuesve të Vetëvendosjes por i gjithë banorëve që jetojnë këtu.

RKL: Për disa  fitorja e Shpendit konsiderohet si fillim i transformimit të Vetëvendosjes. A mendoni se fitorja juaj në Prishtinë kërkon transformimin e Vetëvendosjes meqë rezultatet në komunat e tjera, ashtu siç kanë pranuar drejtues të subjektit tuaj, kanë qenë jo të kënaqshme?

Ahmeti: Le ta vlerësojnë qytetarët punën tonë në komunën e Prishtinës. Në qoftë se vlerësojnë se kjo qeverisje ka transparencë, punon me parime e për sundimin e së drejtës në qytetin tonë, atëherë le ta shohim se ku është i nevojshëm transformimi. Unë mendoj se i nevojshëm është transformimi i institucioneve e jo i Vetëvendosjes. Pra, ne mendojmë se do t’i transformojmë institucionet e Kosovës në institucione më të hapura, ku diskutohet gjithçka e ku mbrohet interesi publik. Mendoj se Vetëvendosja i ka tri tipare e ato janë: kritika, alternativa dhe aktivizmi. Këto unë i mbaj për shkak se besoj thellësisht në to, por edhe në Vetëvendosje ne kemi diskutim të sinqertë. Prandaj nuk do të thosha që është transformim i Vetëvendosjes por Vetëvendosja është gjithmonë aktive në lëvizje dhe mëson e reflekton. Edhe tani nga procesi i zgjedhjeve lokale dhe nga përgatitjet për zgjedhjet nacionale, Vetëvendosja i është futur një procesi të ristrukturimit të brendshëm. Ka qenë hera e parë që kemi marrë pjesë në zgjedhje lokale dhe tash po përgatitemi për zgjedhjet nacionale.

RKL: Një risi që do ta karakterizojë asamblenë e re të kryeqytetit është përbërja e saj e larmishme: asamblistë të LDK-së, të Vetëvendosjes, PDK-së dhe partive tjera. A do të jetë asambleja më aktive në kuptimin e avancimit të projekteve apo do të jetë bllokuese si pasojë e rivaliteteve partiake?

Ahmeti: Patjetër që do të ketë më shumë diskutime. Unë e kam thënë që nga fillimi që çdo propozim do ta jap para të gjitha subjekteve politike të përfaqësuara në Kuvend dhe do të kërkoj nga ato që të japin qëndrimin e tyre rreth këtyre çështjeve. Me disa do të pajtohem e me disa jo, por kjo është e bukura e demokracisë. Në shumicën e rasteve, unë e shoh habinë e qytetarëve dhe subjekteve të tjera politike sesi mund të qeveriset një komunë pa koalicion. Por çka do të thotë koalicioni? Koalicioni do të thotë që kryetari e ka tashmë rrugën e lirë gjithmonë, çdo gjë që dërgon në Kuvend e kalon falë numrave. Unë mendoj se kjo e jona është ndoshta më e mirë për demokracinë sepse unë nuk i kam të sigurt numrat në Kuvendin Komunal për rregullore, me ç’rast çdo rregullore do t’i nënshtrohet diskutimit publik. Mendoj se ky diskutim do të jentë më i shëndetshëm. Ndoshta zgjedhjet nacionale mund të kenë ndikim në bllokimin, refuzimin e gjëra të tilla, por deri më tani kemi hasur në një diskutim të sinqertë politik: ka pasur kundërshtime e miratime.  Secili le t’i mbrojë interesat e subjektit të tij por mos të harrojnë edhe anëtarët e Kuvendit komunal edhe unë si kryetar, përfaqësojmë votat e qytetarëve. Duhet t’i përfaqësojmë interesat publik të qytetarëve e jo vetëm interesat e ngushtë të subjekteve.

RKL: Sapo keni filluar punën si kryetar i komunës. Tani kur është emëruar ekipi qeverisës, si e gjeni gjendjen brenda komunës ose sa është e përgatitur administrata e komunës për të sjellë një mendësi të re të shërbimeve?

Ahmeti: Nuk është problemi te shumica e punëtorëve që punojnë këtu. Mendoj se me ndryshime në menaxhim mund të ndryshohen shumë gjëra: mund të ofrohen shërbime shumë më të mira sesa që kemi pasur deri më sot. Nuk mund të themi se nuk është punuar asgjë, për shkak se nuk është as në stilin tim që të shaj gjithçka është bërë deri më tani, por mendoj se ka pasur hapësirë për përmirësim. Jemi duke gjetur gjëra të ndryshme nëpër drejtori të ndryshme e ato që i vlerësojmë si të parregullta i drejtojmë tek organet e rendit. Thjesht, kemi kërkuar nga secili punëtor që ta ngris nivelin e punës që e ka karshi qytetarëve, por në të njëjtën kohë do të punojmë edhe në përmirësimin e kushteve të këtyre punëtorëve. Nuk i kemi thënë asnjë punëtori që ti je i kësaj apo asaj partie dhe tash duhet të punosh ndryshe ose të largohesh! Ne fillojmë me besim ndaj njerëzve dhe ata që punojnë e janë meritorë do të shpërblehen në aspektin e avancimit në karrierë e ata që nuk punojnë sigurisht se do të ballafaqohen me pengesa.

RKL: Cilët do të jenë hapat e parë për të jetësuar një Prishtinë ndryshe?

Ahmeti: Ne veçse kemi filluar me shumicën e zotimeve që i kemi dhënë në fushatë. E para ka të bëjë me transparencën. Vendimi i parë që kemi marrë ka qenë punësimi në shkolla, ku kemi marrë disa mësimdhënës nëpër shkolla dhe këtë e kemi bërë në mënyrë publike,  ku kemi ftuar edhe Shoqërinë Civile, Këshillin e Prindërve dhe mediet që ta monitorojnë procesin e intervistimit në tri-katër shkollat e para. Këtë do të zbatojmë edhe në intervistat me drejtorët, ku do të shpallim konkursin për pozitë për drejtor të përhershëm. Edhe aty, sipas zotimit që kemi dhënë në fushatë, intervistat do të jenë publike dhe do të kërkojmë prezantim të kandidatëve për publikun e gjerë se çka mendojnë ata të bëjnë për shkollën. Kemi hapur procesin e prokurimit dhe po mendojmë që me Shoqërinë Civile të bashkëpunojmë në këtë drejtim në mënyrë që publiku të ketë qasje të plotë në aspektet  e prokurimit. Kësisoj, publiku do ta mbaj përgjegjës komunën por edhe  kompaninë që fiton për punën që bën. Kam çdo ditë takime me qytetarët, por u kam thënë se çkado që flasin është takim publik. Nuk ka më takime për çështje private që mund t’i diskutojë me mua. Në qoftë se dikush ka problem me qytetin dhe kryetari ka kompetenca për atë çështje, atëherë unë jam i gatshëm të bisedoj me të. Pra, transparenca është hapi i parë që kemi ndërmarrë. I kemi ndalë ndërtimet pa leje; aty ku ka pasur punishte pa leje ndërtimi, i kemi ndalë. Për ato që po punojnë dhe që kanë leje por janë të dyshimta, do të nisim një proces të hetimit dhe qartësimit të planeve rregullative se pse është dhënë leja aty. Poashtu tash do të fillojmë një proces të aksioneve lagje më lagje, ku do të evidentohet uzurpimi i pronës publike me ç’rast do të informohen palët se kjo është pronë e uzurpuar. Është koha e fundit që të kalojmë në një sundim të së drejtës, rregullit dhe rendit në qytetin tonë. Ajo për të cilën po punojmë më së shumti është çështja e ujit sepse është krijuar një situatë e emergjencës, e cila na është shpalosur nga Ujësjellësi. Kemi zhvilluar shumë takime dhe i kemi vlerësuar të gjitha strategjitë dhe opsionet. Nga java e ardhshme do të fillojmë një aktivitet për ngritjen e çështjes së ujit në agjendën publike për shkak se është e padrejtë të investohen me miliona euro në autostrada e asfalt, ndërkohë që një pjesë e madhe e vendit ka probleme bazike me ujë të pijshëm. Niveli i investimeve që shkon nëpër autostrada është shumë më i madh sesa niveli i investimeve që do të siguronin 24 orë ujin e pijshëm në Prishtinë dhe komunat përreth. Po flasim pra për një ndryshim të diskursit politik që duhet të ndodh në Kosovë dhe unë do t’i dërgoj letër Qeverisë qendrore por edhe do të flas në publik për çështjen e ujit dhe si e shohim rrugën përpara.

RKL: Brenda domenit tuaj si komunë, sa do të jeni të gatshëm të përtërini rrjetin e ujësjellësit kur dihet se ai do të kërkonte investime enorme meqë i tërë kryeqyteti thuajse është me rrjet të vjetruar?

Ahmeti: Komunikimi i komunës me Ujësjellësin në të kaluarën ka qenë jashtëzakonisht i keq. Komuna ka bërë investime në rrjet, për të cilin Ujësjellësi tash thotë se është i papërdorshëm. Kjo është e papranueshme se në qoftë se është shpenzuar paraja publike, atëherë dikush duhet të mbajë përgjegjësi, ose pala që e ka ndërtuar pa pyetur ose pala që nuk po e pranon. Ne jemi të gatshëm të marrim pjesën tonë të zotimit, por në qoftë se ne marrim zotim dhe tjetërkush pastaj e zbaton pa i dhënë përgjegjësi fare klientit më të madh që ka, atëherë nuk mund të vazhdojmë më tutje në këtë mënyrë. Ne dëshirojmë që kur të japim zotime, qoftë kërkesa për investime te Qeveria ose donatorët, të vazhdojmë por jo me këto lloj mungese të mbikëqyrjes ose raportimit para Kuvendit Komunal. Prishtina është konsumatori më i madh i Ujësjellësit Regjional ‘Prishtina’ me 70% të konsumatorëve; të hyrat më të madha kjo kompani i ka nga komuna jonë. Ka një donator e ajo është KFW gjermane që investon gati 60 milionë euro në rrjet. Mendojmë se ka nevojë për investime të tjera. Kemi gjetur poashtu burime të tjera që do të ndikonin në mbushjen e liqenit të Batllavës, e të cilat do t’i bëjmë publike më vonë. Mendojmë se me investime të vogla mund të procedojmë në një situatë shumë më të mirë sa i përket furnizimit me ujë të pijshëm, por të gjitha palët duhet ta marrin përgjegjësinë e vet.

RKL: Një prej premtimeve qendrore, e mbase edhe një prej sfidave më të mëdha në mandatin tuaj qeverisës, është kaosi urbanistik i kryeqytetit në të cilën ka gisht edhe mafia endemike e ndërtimeve. Disa thonë se premtimi për shkatërrimin e të gjitha ndërtimeve pa leje është paksa pretencioz, për të mos thënë i pamundshëm. Si do t’i kundërvihet komuna trendit të shfrenuar të urbanizimit?

Ahmeti: Ligji për legalizimin ka kaluar. Ky ligj nënkupton që të gjithë ata që kanë ndërtuar para 25 gushtit dhe që konsiderohen ndërtime pa leje do të evidentohen si ndërtime pa leje dhe pastaj do t’u bëhet ftesë që të aplikojnë për legalizim. Kushti për këtë leje është që ndërtimi të jetë në pronë të atij personi e pastaj t’i përmbush kushtet rregullative. Ne po presim Udhëzimet Administrative nga Ministria e Planifikimit Hapësinor dhe nga gjysma e dytë e vitit 2014 do të fillojmë me procesin e aplikimit. Ato ndërtesa që marrin lejen dhe legalizohen, do ta paguajnë taksën e legalizimit. Kurse, ato që nuk legalizohen hyjnë në listën e rrënimit. Ka tri kategori të listës, ku një e zbaton Ministria e dy të tjera Komuna. Ndërsa për ato ndërtime që janë pas 25 gushtit të vitit të kaluar, aty nuk do të ketë tolerancë sepse pastaj ne do të mbaheshim përgjegjës ligjërisht pse nuk kemi vepruar. Ne duam që të lejojmë secilin që dëshiron të investojë, në mënyrë që të zhvillohet edhe sektori i ndërtimtarisë, por jo në shpinë të mungesës së rregullit dhe banorëve. Ne kemi probleme, të cilat në procesin e legalizimit duhet t’i shikojmë. Këtë nuk e ka ngritur thuajse askush deri më tani. Ka objekte që janë të ndërtuara mbi rrjetin kryesor të ujësjellësit dhe ka objekte të tjera që janë të ndërtuara nën përçuesin e rrymës 110 kilovatësh. Një pëlcitje e mundshme e rrjetit të ujit mund të çoj deri te shembja e asaj ndërtese, ndërsa ndërtesa që është nën rrjetin e transmisionit, rrezaton nxehtësi që mund të shkaktojë probleme shëndetësore për të gjithë ata që banojnë aty. Për mua siguria e qytetarit është prioriteti numër një. Prandaj duhet t’i diskutojmë këto gjëra publikisht. Nuk jemi të drejtuar kundër askujt, nuk na intereson nëse dikush është i ndonjë subjekti. Madje është përmendur pak se njëri nga objektet e rrënuara ka qenë e një anëtari të lëvizjes Vetëvendosjes që ka qenë kandidat yni, por që nuk ka pasur leje. Kjo është mënyra e vetme për të krijuar mirëkuptimin e qytetarëve – rezistenca krijohet kur thotë një qytetar ‘Pse vetëm mua…ka edhe kojshiu?!’.  Nëse e zbatojmë ligjin pa dallime, atëherë askush nuk mund të ankohet dhe kështu krijohet koalicioni me qytetarin. Jemi të interesuar ta ndihmojmë edhe biznesin në harmoni midis aktiviteteve biznesore dhe atyre të banimit; të mundësojmë zhvillimin e qytetit në kahje të reja dhe ta kuptojmë më mirë sesi mund të frymojë më mirë ky qytet në të ardhmen.

RKL: Në mandatet e kaluara, LDK dhe kryetari i saj akuzoheshin se i orientonin shumë nga investimet në fshatrat e zonës së ish-kryetarit, Mustafa. Në të shumtën e rasteve, këto investime kufizoheshin vetëm në infrastrukturën rrugore pavarësisht se nevojat e qytetarëve në fshatrat e Prishtinës janë më të mëdha se kaq. Cili do të jetë angazhimi i komunës në raport me bujqësinë, blegtorinë dhe aspekte të tjera ekonomike të fshatrave të Prishtinës?

Ahmeti: Mendojmë se deri kah fundi i vitit (shtatori ose tetori) do të implementojmë projektin e tregut të prodhimeve vendore, ndoshta edhe të një pike të grumbullimit në disa fshatra. Ne tashmë i kemi marrë kërkesat për investime kapitale nga të gjitha bashkësitë lokale, të cilat do t’i trajtojmë në mënyrë të barabartë duke i shpërndarë investimet në mënyrë të barabartë për vendbanimet dhe duke marrë në konsideratë madhësinë e tyre. Në këtë drejtim, mendoj se një pjesë e madhe e këtyre kërkesave do t’i zbatojmë këtë vit e ato që mbesin do t’i vazhdojmë në vitet e ardhshme, duke e konsideruar buxhetin që e kemi si komunë. Nuk e kemi synimin që të investojmë miliona euro nëpër sheshe. Mendoj se këto para do t’i shpenzojmë gjithmonë duke pasur parasysh aty ku ka nevojë më së shumti. E kemi një problem, që unë e them publikisht, se në buxhetin e Prishtinës janë të parapara 3 milionë euro për shpronësim me rastin e ndërtimit të ndonjë rruge në afërsi të tokave. Ndërsa vetëm tani i kemi diku 300 lëndë të shpronësimit që nuk janë ekzekutuar. Pra, borxhi i komunës ndaj të shpronësuarëve është shumë më i madh sesa buxheti. Kemi psh disa rrugë, ku kostoja e rrugës është 870 mijë euro, ndërsa shpronësimi i tokës për ndërtimin e rrugës është 10 milionë euro. Si rrjedhim, ne nuk mund të procedojmë me këtë projekt për shkak se nuk i kemi paratë e nevojshme. Këtë duhet ta kuptojnë edhe vetë banorët, ndërsa duhet të shihet mundësia për të ardhmen nëse është e mundur që edhe banorët të kontribuojnë me një pjesë të tokës së tyre për ndërtimin e rrugës. Pra, shpronësimi mbetet sfida kryesore e ndërtimit e infrastrukturës.

RKL: Sa do të aktivizohen bashkësitë lokale (për t’i afruar shërbimet qytetarit) për shkak se shumica e këtyre bashkësive lokale kanë vepruar si filiale të LDK-së të mbushura me militant të saj?

Ahmeti: Kam pasur takime me të gjitha bashkësitë lokale të  komunës Prishtinës, ku u kemi  shpalosur mënyrën e re të komunikimit. Ne jemi të interesuar që të funksionalizojmë bashkësitë lokale. Gjatë funksionalizimit, ne do të shohim nëse ato i kanë kushtet dhe infrastrukturën, por edhe mënyrat e përfaqësimit të qytetarëve në ato bashkësi lokale. Unë si kryetar, jam i interesuar që të ketë bashkësi lokale, sepse ato janë pika e parë e komunikimit me qytetarë. Por dua të sigurohem që një kryetar i një bashkësie lokale është zgjedhur duke u konsultuar me të gjithë banorët e një lagje (p.sh lagjes Dardania). Ka këshilla të lagjeve ku janë të përfaqësuara të gjitha hyrjet e ndërtesave, e këta këshilla duhet të përfaqësojnë interesat e të gjithë banorëve të atyshëm. E nëse ndodh kjo, atëherë ne jemi të interesuar që një pjesë të buxhetit ta ndajmë për bashkësitë lokale. Me këtë rast do t’i ndahet një bashkësie lokale një shumë financiare për investime kapitale dhe lagjja do të jetë ajo që do të përcaktojë prioritetet e saj. Nëse këtë e arrijmë gjatë mandatit tonë, atëherë ne do të bëjmë Prishtinën shumë më demokratike. Është e pamundshme për një kryetar që ta udhëheq një komunë me një numër kaq të madh banorësh pa pasur bashkësi lokale, të cilat janë dera e parë për qytetarët si dhe janë instrument i komunës për të zbatuar politika.

RKL: Kur jemi te çështja e shërbimeve, sa do të luftoni procedurat e ndërlikuara burokratike që kanë karakterizuar administratën pararendëse. A keni ndonjë plan për thjeshtëzimin e këtyre procedurave, rritjen e efektivitetit të shërbimeve dhe shmangies së radhëve të gjata të qytetarëve që kërkojnë shërbime?

Ahmeti: Ju e dini që përmes një vendimi të thjeshtë, ne kemi hequr pauzën, gjë që e cila është keqkuptuar nga disa se gjoja ne nuk po u lëmë pushim punëtorëve. Ne e kemi bërë asisoj që gjysma e punëtorëve të shkojnë në pushim prej 10:00 deri në 11:00 dhe gjysma tjetër nga 11:00 deri në 12:00 dhe kështu sportelet mbahen hapur gjatë gjithë orarit të punës. Ne po mundohemi që tani t’i thjeshtëzojmë procedurat  e që të mos ketë nevojë të shkohet në 3-4 sportele për një punë të thjeshtë. Ne jemi duke i analizuar shkaqet që shkaktojnë radhë të gjata, si mund ta tejkalojmë këtë dhe së shpejti pritet që të vëmë në përdorim edhe shërbimet online. Kjo do të thotë se qytetarët do të mund të aplikojnë për certifikata e gjëra të tjera edhe përmes faqes. Synojmë që një shërbim të mos zgjas më shumë se 20 minuta në komunën e Prishtinës. Është e vërtetë se kemi shumë kërkesa, por me një organizim më të mirë mund t’i shmangim pritjet e gjata. Pra, ky është një nga projektet kryesore për gjysmën e parë të këtij viti.

RKL: Në bazë të regjistrimit të fundit të popullsisë, komuna e Prishtinës rezultoi të ketë një popullsi rreth 190 mijë banorë, përderisa është besuar së ky numër duhet të jetë shumë herë më i madh, madje më shumë se gjysmë milioni. Ky regjistrim duket se nuk i ka dhënë fund pyetjeve rreth numrit të popullsisë së kryeqytetit, duke shtuar edhe më shumë konfuzitetin. Cili është qëndrimi juaj rreth kësaj çështje, meqë prej saj përcaktohen fondet qeveritare për komunën?

Ahmeti: Jo vetëm që ka shtuar konfuzitetin, por nga viti i ardhshëm do të na zvogëlojë dukshëm buxhetin. Siç e dimë, grantet qeveritare ndahen në bazë të numrit të popullatës. Ne përpara e kemi pasur numrin e banorëve 380 mijë banorë dhe tash bie në 200 mijë banorë! Kjo nënkupton që një pjesë e madhe e buxhetit përgjysmohet dhe humbjet mund të jenë 8 deri në 10 milionë euro, gjë që është e papërballueshme për ne si komunë. Nëse shikohet numri i nxënësve që ka Komuna e Prishtinës, ky numër prej 197 mijë del i pasaktë. Ne njohim një numër të madh njerëzish që kanë vendbanimin gjetkë por jetojnë në Prishtinë; kemi 40 mijë studentë të Universitetit Publik që jetojnë për 9 muaj në Prishtinë si dhe mysafirë nga komunat e tjerë që vijnë për shkak të Qeverisë e institucioneve të tjera qendrore. Pra, qyteti jonë mirëpret më shumë njerëz sesa që pretendohet. Këto diskutime veçse i kemi filluar dhe do të procedojmë shumë shpejt me ligjin për Prishtinën. Kjo nuk është në agjendën qeveritare por mendoj se do të futet pas diskutimeve. Është obligim nga ligji për Vetëqeverisjen komunale dhe obligim kushtetues ku thuhet se Prishtina do ta ketë ligjin e saj të veçantë. Nuk i kuptojmë arsyet e vonimit të këtij ligji; mund t’i kuptojmë kundërshtimet por ato nuk mund të jenë asnjëherë pengesë për një ligj. Mendoj se këto çështje do t’i zgjidhim përmes kalimit të ligjit për Prishtinën. Duhet një trajtim ndryshe i kryeqytetit për shkak se jemi nikoqir të të gjithë qytetarëve të Kosovës që kanë nevojë për shërbime.

RKL: Gjatë dy viteve të fundit, komuna e Prishtinës ka pasur një suficit të konsiderueshëm të buxhetit. Cili do të jetë qasja e komunës në raport me aplikimin e tatimeve ndaj bizneseve dhe sa do krijohen kushtet për hapjen e bizneseve të reja?

Ahmeti: Buxheti i Prishtinës është 63 milionë euro. Vitin e kaluar kanë shpenzuar 67 milionë,  por është një shumë prej 15 milionë eurosh e cila thuajse qe 7 vite bartet prej vitit në vit. Ne duhet të shikojmë gjatë këtij mandati se cila ështtë mënyra më e shpejtë që këtë shumë ta sjellim në zero, sepse një komunë që ka para në dispozicion dhe nuk i shpenzon, atëherë mund të shfaqen probleme. Por edhe kapaciteti absorbues i komunës nuk ndryshon 50% përnjëherë . Ne nuk guxojmë t’i rrisim pagat, ne duhet t’i rrisim investimet kapitale që të ketë bazë të zhvillimit ekonomik. Presim të hyra më të mëdha gjatë vitit të ardhshëm nga taksa e legalizimit. Poashtu kemi një mbledhje të mirë të tatimit në pronë dhe do ta bëjmë reformimin e tatimeve në këtë aspekt. Ne kemi taksa prej 0.15% deri në 1% mundësi  nga Ministria që na lejon tatimin mbi pronë. Mendojmë se këtë taksë do ta bëjmë progresive, ku ata persona që kanë nga 5-6 banesa duhet të paguajnë tatim më të lartë për shkak se ky është luks. Ato familje me 10 anëtarë e që banojnë në një banesë 60 metra katrorë, do të duhej të kishte tatim më të ultë në pronë. Ato banesa që i kanë të gjitha shërbimet nga komuna, do të paguajnë tatim më të lartë në pronë. Të gjitha këto i kemi marrë duke ndjekur shembullin nga qytetet e tjera. Jemi duke u marrë me gjërat një nga një, për shkak se përpjekja për t’u marrë me të gjitha gjërat në të njëjtën kohë na lë të mangët në çdo drejtim. Prandaj, gjatë këtij mandati synojmë që t’i zbatojmë të gjitha prioritetet.

RKL: Disa nga projektet kryesore infrastrukturore në Prishtinë, si p.sh rreth-rrotullimi në Veternik, kanë mbetur në gjysmë. Si pasojë, komunikacioni është ngarkuar si asnjëherë më parë jo vetëm aty, por në të gjitha pjesët e qytetit. Ndërkohë, qytetarët ankohen vazhdimisht për uzurpimin e thuajse të gjitha trotuareve nga makinat. Cilat do të jenë hapat konkret që do të ndërmarrë komuna karshi këtij fenomeni?

Ahmeti: Mendoj se jeni mediumi i parë të cilit i them publikisht që rrethrrotullimin do ta përfundojmë në maj të këtij viti. Mendoj, se nga java e ardhshme do të vazhdojmë me zbatimin e projektit, me rrënimin e disa objekteve aty që kanë penguar rrethrrotullimin. Të gjitha procedurat kanë përfunduar, ndërsa tash pritet një leje për kompaninë që të vazhdojë punimet. Unë atë leje do ta ndryshoj së shpejti, por aty është një pompë e benzinës që kërkon një rrënim të kujdesshëm për shkak të efektit në mjedis. Pra, qershori nuk do të na zë  pa atë rrethrrotullim. Sa u përket trotuareve, ne kemi nisur një aksion, por ka më shumë probleme të cilat kanë të bëjnë me transportin.  Tash do të nisim një fushatë tjetër e cila  ka të bëjë më implementimin më të mirë, mirëpo kjo po varet edhe nga transporti publik. Ne fillimisht duam ta rregullojmë transportin publik e pastaj të hyjmë në politikat respektive të makinave. Pra, nëse kemi një transport publik që funksionon mirë, atëherë shumë lehtë është që t’u thuash makinave se nuk ka parkingje ku të doni. Njëherë duhet të punojmë në çlirimin e qytetit edhe për transport, edhe që t’u ofrojmë hapësira të parkingut makinave. Ne duhet ta ndryshojmë një ves që është krijuar kur dikush shkon në bankë për të kryer ndonjë shërbim atëherë ai e parkon veturën para bankës nëse shkon të komuna, e parkon para komunës. Një gjë e tillë nuk ngjan askund në botë për shkak se të gjitha institucionet do të duhej të ishin me parkingje. Këto janë gjërat të cilat ne po mundohemi t’i kuptojmë më mirë. Është një studim që po bëhet, e  që ka të bëjë më mobilitetin e qytetarëve, prej nga na dalin  qytetarët në mëngjes dhe lagje, sa është numri i tyre, prej nga na vijnë, në mënyrë që politikat pastaj t’i bëjmë në përputhje më këtë.

29 janar 2014

Kontrolloni gjithashtu

Dr. spec. Selami Sylejmani flet për Dr. Faherdin Hotin

Dr. spec. Selami Sylejmani flet për Dr. Faherdin Hotin

Të kërkoni nga unë që të flas për Dr. Faherdin Hotin, dhe ti shpalos kujtimet ...