Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Prania e NATO-s në Kosovë, përmes misionit paqeruajtës KFOR, nuk pritet të ndikohet nga ndryshimet e mundshme në arkitekturën e sigurisë evropiane, ndërsa perspektiva e anëtarësimit të Kosovës në Aleancë dhe marrëdhëniet e saj të sigurisë me Shtetet e Bashkuara mund të përballen me sfida të reja. Kështu ka vlerësuar ish-zyrtari i lartë i NATO-s, Jamie Shea, në një intervistë për Radion Evropa e Lirë, duke komentuar propozimin amerikan për një kornizë të re të sigurisë evropiane, në kohën kur administrata e presidentit Donald Trump po zhvillon përpjekje diplomatike për përfundimin e luftës në Ukrainë. Sipas Shea-s, për Kosovën rëndësi të veçantë kanë dy zhvillime: përpjekjet e Rusisë për të penguar zgjerimin e NATO-s dhe synimet për kufizimin e pranisë ushtarake amerikane në Evropë. Megjithatë, ai nuk pret që këto zhvillime të ndikojnë drejtpërdrejt në misionin e KFOR-it. “Nuk do të mendoja se po”, është përgjigjur Shea, kur është pyetur nëse ndryshimet e mundshme në sigurinë evropiane mund të kenë pasoja për praninë e NATO-s në Kosovë. Ai ka argumentuar se KFOR-i ka mandat të veçantë paqeruajtës, të bazuar në Rezolutën 1244 të Këshillit të Sigurimit të OKB-së, të miratuar në vitin 1999, përfshirë edhe me votën e Rusisë. Sipas tij, synimi i Rusisë për kufizimin e pranisë së forcave të NATO-s me armatim të rëndë në Evropën Qendrore dhe Lindore nuk përfshin domosdoshmërisht misionin paqeruajtës në Kosovë. KFOR-i është vendosur në Kosovë pas përfundimit të luftës më 1999 dhe ka për detyrë të kontribuojë në ruajtjen e një mjedisi të sigurt dhe të lirisë së lëvizjes për të gjitha komunitetet. Pas përforcimit të pranisë së tij në vitin 2023, në kuadër të misionit shërbejnë rreth 4.700 ushtarë.
