Kryeministri takon fermerët e Ferizajt të cilët kanë dalë për të protestuar sot para objektit të Qeverisë së Kosovës

Kryeministri i vendit, Ramush Haradinaj është takuar me fermerët e Ferizajt të cilët kishin dalë për të protestuar para objektit të Qeverisë së Kosovës. Pakënaqësitë e tyre kishin të bënin me dëmet e shkaktuara nga vërshimet. Gjatë takimit, ai tha se Qeveria e vendit do të ndërmarrë hapa konkretë në krijimin e një sistemi për kompensimin e dëmeve si një nismë e iniciuar në ekzekutiv vitin e kaluar dhe që nuk është trajtuar asnjëherë më parë. Haradinaj tha se nuk i ka harruar ata, por që ka pas një radhë sipas dëmeve që kanë qenë më të mëdha, si në Komunën e Rahovecit, Suharekës, Mamushës, Shtimes, Ferizajt dhe disa dëme që janë shkaktuar në Komunën e Istogut dhe që vazhdojnë të përsëriten. Më tej kryeministri theksoi se do të shqyrtohen kërkesat e tyre legjitime në Qeveri, pasi që këtë shqetësim e kanë ngritur edhe përfaqësuesit politikë të asaj komune. Fermerët protestues e falënderuan atë për gatishmërinë që të dëgjoi shqetësimet dhe kërkesat e tyre dhe kërkuan që ato të shqyrtohen sa më parë që është e mundur.