Mehmet Bislimi: Plakut-Xheladin Gashit

vendosmërisht rrugëtoi

 

me këmbët e veta mbi prushin e lirisë

 

me vdekjen u mat sa herë

 

në kopshtin e atdheut mbolli

 

trëndafilat e kuq

 

 

 

në agimin e parë

 

këngë për ne përcolli ëmbëlsisht

 

mbi telat e çiftelisë

 

për ty

 

për mua

 

për brezin e ri

 

për të nesërmen e lirë

 

ku nuk do t’i vrasin të merituarit

 

ku nuk do të maten

 

të paburrat

 

me hijen e burrit

 

 

 

Plaku

 

gjurmët e tij la

 

shtigjeve të atdheut

 

ku dikur kishte shkelur me këmbë

 

kalldrëmeve të qytetit të vjetër

 

me peshën e tij

 

hequr rëndë

 

si asnjë gjurmë tjetër

 

 

 

gjurmë urtie e plakut tonë

 

si atë kohë

 

edhe sot

 

heshtur e pa zhurmë

 

punës i dilte zot

 

më ballin lartë

 

më lartë se mali

 

një fjalë të ligë nuk e tha

 

dashuri për atdhe

 

fali

 

 

 

Plaku

 

para së të fliste

 

mendohej mirë

 

me dashje të tjerët nuk i lëndonte

 

as me të bëma

 

as me fjalë

 

robërinë shpirtërore e kishte mundur

 

Plaku dinte

 

vetëm me falë

 

 

 

me besën e dhënë

 

në mes të lëndinës

 

së lotëve të atdheut

 

vërshim lotësh i paparë

 

një shije e pështirë

 

mbi lëndinën e madhe

 

ku po matej burrëria në kandar

 

ku vallja jonë u përgjak

 

Plaku

 

atdheut nuk i hyri në hak

 

dje ishte po ai

 

edhe sot

 

i urti

 

i madhi Plak

 

 

 

Plaku i djeshëm më i ri se sot

 

si buka jonë e përditshme

 

që s’na ngopë

 

jo

 

me ju

 

me krenarinë tuaj

 

me admirimin për Dëshmorët e Kombit

 

nuk do të ngopemi kurrë

 

dje plak

 

sot i ri

 

nesër burrë

Kontrolloni gjithashtu

Doli nga shtypi libri: “Gjykimi i drejtë në procedurën penale dhe ndikimi i publicitetit në parimin e gjykimit të drejtë” i autores, Mirvete Zogiani-Uka

Doli nga shtypi libri: “Gjykimi i drejtë në procedurën penale dhe ndikimi i publicitetit në parimin e gjykimit të drejtë” i autores, Mirvete Zogiani-Uka

Libri studimor, “Gjykimi i drejtë në procedurën penale dhe ndikimi i publicitetit në parimin e …